సూప‌ర్ స్టార్ మాట త‌ప్పుతున్నాడా?

అడివి శేష్ న‌టించిన సినిమా `మేజ‌ర్‌`. శ‌శికిర‌ణ్ తిక్క ద‌ర్శ‌క‌త్వం వ‌హించిన ఈ మూవీని మేజ‌ర్ సందీప్ ఉన్నికృష్ణ‌న్ జీవిత క‌థ ఆధారంగా సెప్టెంబ‌ర్ 11 హోట్ తాజ్ పై ఉగ్ర మూక‌లు జ‌రిపిన దాడి నేప‌థ్యంలో తెర‌కెక్కించారు. ఈ సినిమాకు సూప‌ర్ స్టార్ మ‌హేష్ బాబు నిర్మాత‌గా వ్య‌వ‌హ‌రించిన విష‌యం తెలిసిందే. ఈ మూవీ రిలీజ్ సంద‌ర్భంగా ప్ర‌మోష‌న‌ల్ ఈవెంట్ లో పాల్గొన్న మహేష్ బాబు బాలీవుడ్ ఎంట్రీపై సంచ‌ల‌న వ్యాఖ్య‌లు చేసిన విష‌యం తెలిసిందే.

బాలీవుడ్ లో న‌టిస్తారా? అన్న ప్ర‌శ్న‌కు స‌మాధానంగా త‌న‌ని బాలీవుడ్ భ‌రించ‌లేద‌ని, అక్క‌డికి వెళ్లి నా టైమ్ ని వేస్ట్ చేసుకోలేన‌ని, తెలుగు చిత్ర‌ప‌రిశ్ర‌మ నాకు స్టార్ డ‌మ్‌ని, ప్రేక్ష‌కుల ప్రేమ‌ని అందించింద‌ని, అలాంటి ఇండ‌స్ట్రీని వ‌దిలి బాలీవుడ్ కు వెళ్లాల‌నుకోవ‌డం లేద‌ని, ఇక్క‌డి సినిమాలే దేశ వ్యాప్తంగా వైర‌ల్ అవుతాయ‌ని భావించాన‌ని, అది ఇప్పుడు నిజ‌మ‌వుతోంద‌ని స్ప‌ష్టం చేశారు. మ‌హేష్ చేసిన వ్యాఖ్యలు బాలీవుడ్ వ‌ర్గాల్లో పెద్ద దుమారాన్ని రేకెత్తించాయి.

దీంతో మ‌హేష్ వ్యాఖ్య‌ల‌పై ప‌లువురు బాలీవుడ్ నిర్మాత‌లు, ద‌ర్శ‌కులు వ్య‌గ్యంగా స్పందించారు. కొంత మంది సెటైర్లు వేశారు. ఆ త‌రువాత మ‌హేష్ వ్యాఖ్య‌ల‌పై పెద్ద చ‌ర్చే జ‌రిగింది.

ఇదిలా వుంటే బాలీవుడ్ ఎంట్రీపై సంచ‌ల‌న వ్యాఖ్య‌లు చేసి పెద్ద‌ చ‌ర్చ‌కు తెర‌లేపిన మ‌హేష్ త్వ‌ర‌లో బాలీవుడ్ లోకి భారీ ప్రాజెక్ట్ తో ఎంట్రీ ఇవ్వ‌బోతున్నారంటూ వార్త‌లు వినిపిస్తున్నాయి. ఇటీవ‌ల `స‌ర్కారు వారి పాట‌` మూవీతో ఫ్యాన్స్ ని తీవ్రంగా నిరుత్సాహ ప‌రిచిన మ‌హేష్ బాబు త్వ‌ర‌లో త్రివిక్ర‌మ్ తో సినిమా చేయ‌బోతున్న విష‌యం తెలిసిందే.

SSMB28 అనే వ‌ర్కింగ్ టైటిల్ తో రూపొంద‌నున్న ఈ మూవీని హారిక అండ్ హాసిని క్రియేష‌న్స్ బ్యాన‌ర్ పై ఎస్‌. రాధాకృష్ణ నిర్మించ‌నున్నారు. ప్ర‌స్తుతం ప్రీ ప్రొడ‌క్ష‌న్ వ‌ర్క్ జ‌రుపుకుంటున్న ఈ మూవీ రెండు నెలల క్రిత‌మే లాంఛ‌నంగా పూజా కార్య‌క్ర‌మాలు పూర్తి చేసుకుంది. ఆగ‌స్టు రెండ‌వ వారం నుంచి రెగ్యుల‌ర్ షూటింగ్ ని ప్రారంభించ‌బోతున్నామ‌ని చిత్ర బృందం ఇప్ప‌టికే ప్ర‌క‌టించింది. అంతే కాకుండా వ‌చ్చే ఏడాది స‌మ్మ‌ర్ కు సినిమాని విడుద‌ల చేస్తామంటూ కూడా ప్ర‌క‌టించింది.

ఈ మూవీ త‌రువాత జ‌క్క‌న్న రాజ‌మౌళితో భారీ పాన్ ఇండియా మూవీని చేయ‌బోతున్న విష‌యం తెలిసిందే. ఆఫ్రికా అడ‌వుల నేప‌థ్యంలో సాగే యాక్ష‌న్ అడ్వెంచ‌ర్ గా ఈ మూవీని రాజ‌మౌళి తెర‌పైకి తీసుకురానున్న విష‌యం తెలిసిందే. ఈ మూవీతో మ‌హేష్ బాలీవుడ్ కు ప‌రిచ‌యం కానున్నార‌ని వార్త‌లు వినిపిస్తున్నాయి. అంతే కాకుండా దుర్గా ఆర్ట్స్ అధినేత కె.ఎల్‌. నారాయ‌ణ నిర్మించ‌నున్న ఈ మూవీకి బాలీవుడ్ స్టార్ ప్రొడ్యూస‌ర్ క‌ర‌ణ్ జోహార్ స‌మ‌ర్ప‌కుడిగా వ్య‌వ‌హ‌రించ‌నున్నార‌ని తెలుస్తోంది. అంతే కాకుండా హిందీలో భారీ స్థాయిలో ఈ మూవీని రిలీజ్ చేయాల‌ని ప్లాన్ చేస్తున్నార‌ట‌. దీంతో సూప‌ర్ స్టార్ మ‌హేష్ తాను అన్న‌ మాట త‌ప్పుతున్నాడ‌ని అంటున్నారు.