యువ హీరో కంబ్యాక్ అయినట్లేనా..?

యంగ్ హీరో రాజ్ తరుణ్ 'ఉయ్యాలా జంపాల' 'సినిమా చూపిస్తా మామ' 'కుమారి 21F' వంటి సినిమాలతో సూపర్ హిట్స్ అందుకున్నాడు. అయితే ఆ తర్వాత కొన్నాళ్ల పాటు రాజ్ తరుణ్ ని వరుస పరాజయాలు పలకరించాయి. హిట్ అనేది అందని ద్రాక్షలా మారిపోయిందనుకుంటున్న సమయంలో 'ఒరేయ్ బుజ్జిగా' సినిమా సక్సెస్ అయింది. 'గుండజారి గల్లంతయ్యిందే' ఫేమ్ విజయ్ కుమార్ కొండా దర్శకత్వంలో వచ్చిన ఈ చిత్రం తెలుగు డిజిటల్ ఫ్లాట్ ఫార్మ్ 'ఆహా' లో డైరెక్ట్ ఓటీటీ పద్దతిలో రిలీజ్ అయింది. మంచి వ్యూయర్ షిప్ తెచ్చుకోవడంతో రాజ్ తరుణ్ కి వరుస ఆఫర్స్ తలుపుతట్టాయి.

'ఒరేయ్ బుజ్జిగా' సినిమాని డైరెక్ట్ చేసిన విజయ్ కుమార్ కొండా దర్శకత్వంలో మరో సినిమా చేస్తున్నాడు రాజ్ తరుణ్. అలానే డ్రీమ్ టౌన్ ప్రొడక్షన్స్ బ్యానర్ లో సాంటో(మోహన్ వీరంకి) దర్శకత్వంలో ఓ సినిమా చేస్తున్నాడు. రాజ్ త‌రుణ్ కెరీర్లో 15వ చిత్రంగా రానున్న ఈ చిత్రంలో వర్ష బొల్లమ్మ హీరోయిన్ గా నటించనుంది. ప్రస్తుతం యువ హీరో భీమ‌వ‌రంలో సంద‌డి చేస్తున్నాడు. ఈ చిత్రం కోడి పందెం నేపథ్యంలో రూపొందుతోందని సమాచారం. ఏదేమైనా మ‌ళ్లీ క‌మ్ బ్యాక్ అయిన రాజ్ తరుణ్.. వరుస హిట్స్ అందుకుని ఫార్మ్ ని కొనసాగిస్తాడేమో చూడాలి.