బాలయ్య - దిల్ రాజు మధ్య డీల్ కుదిరిందా..??

టాలీవుడ్ సూపర్ సీనియర్ హీరోల్లో ఒకరైన నటసింహం నందమూరి బాలకృష్ణ.. 'అఖండ' సినిమాతో మళ్లీ సక్సెస్ ట్రాక్ ఎక్కారు. ప్రస్తుతం క్రాక్ దర్శకుడు గోపీచంద్ మలినేని కాంబినేషన్ లో ఓ మాస్ యాక్షన్ ఎంటర్టైనర్ లో నటిస్తున్నారు. మైత్రీ మూవీ మేకర్స్ బ్యానర్ లో ఈ మూవీ రూపొందుతోంది. ఈ క్రమంలో తదుపరి ప్రాజెక్ట్ కోసం టాలెంటెడ్ డైరెక్టర్ అనిల్ రావిపూడితో కలిసి పనిచేయనున్నారు బాలయ్య.

బాలకృష్ణ పుట్టినరోజు సందర్భంగా శుక్రవారం అనిల్ రావిపూడి దర్శకత్వం వహించనున్న #NBK108 ప్రాజెక్ట్ కు సంబంధించిన అధికారిక ప్రకటన వచ్చింది. ఫస్ట్ లుక్ లేదా ప్రీ లుక్ పోస్టర్ తో అనౌన్స్ మెంట్ ఉంటుందని అందరూ అనుకున్నారు కానీ.. అలా జరగలేదు. ఇక ఈ సినిమాకి నిర్మాత ఎవరు? ఏ బ్యానర్ లో రూపొందిస్తారనే విషయాన్ని కూడా వెల్లడించకపోవడం గమనార్హం.

షైన్ స్క్రీన్స్ బ్యానర్ పై సాహు గారపాటి - హరీష్ పెద్ది కలిసి #NBK108 చిత్రాన్ని నిర్మించనున్నారని చాలా రోజుల క్రితమే వార్తలు వచ్చాయి. అయితే అనౌన్స్ మెంట్ పోస్టర్ లో బ్యానర్ పేరుని ప్రస్తావించకపోవడంతో.. అసలు ఈ ప్రతిష్టాత్మక ప్రాజెక్ట్‌ ను ఎవరు బ్యాంక్ రోల్ చేస్తున్నారనే చర్చ మొదలైంది. ఈ క్రమంలో బాలయ్య సినిమా నిర్మాణంలో అగ్ర నిర్మాత దిల్ రాజు భాగం కానున్నారనే ఓ రూమర్ చక్కర్లు కొడుతోంది.

అనిల్ రావిపూడి ఫస్ట్ సినిమా 'పటాస్' తప్ప మిగతా అన్ని చిత్రాలను దిల్ రాజు నిర్మించిన సంగతి తెలిసిందే. ఇప్పుడు #NBK108 ప్రాజెక్ట్ ను కూడా ఆయనే నిర్మిస్తారని అంటున్నారు. కాకపోతే దిల్ రాజు దీనికి కో-ప్రొడ్యూసర్‌ గా మాత్రమే చేరనున్నారట. శ్రీ వెంకటేశ్వర క్రియేషన్స్ తో పాటుగా షైన్ స్క్రీన్స్ సంస్థ కూడా నిర్మాణంలో భాగం పంచుకోనుందని టాక్ నడుస్తోంది. బాలయ్య బర్త్ డే నాడు ఆయన ఇంటికెళ్లి స్పెషల్ గా దిల్ రాజు విష్ చేయడం ఈ వార్తలకు బలం చేకూరేలా చేసింది.

టాలీవుడ్ స్టార్స్ అందరితో సినిమాలు చేసిన దిల్ రాజు.. సీనియర్ హీరోలలో అక్కినేని నాగార్జున - విక్టరీ వెంకటేష్ లతో చిత్రాలను నిర్మించారు. ఇప్పుడు బాలకృష్ణ మూవీ నిర్మాణంలో భాగస్వామిగా ఉండబోతున్నాని అంటున్నారు. ఇందులో నిజమెంతో తెలియాలంటే ఇంకొన్నాళ్లు ఆగాల్సిందే.

బాలయ్య - అనిల్ కాంబోలో తెరకెక్కనున్న మాస్ ఎంటర్‌టైనర్ సెప్టెంబర్‌ లో ప్రారంభం కానుందని టాక్. ప్రస్తుతం ప్రీ ప్రొడక్షన్ వర్క్ జరుపుకుంటోంది. ఇది తండ్రీ కూతురు మధ్య నడిచే కథ అని.. బాలకృష్ణ ఇందులో యాభై ఏళ్ల వయసున్న తండ్రి పాత్రలో కనిపిస్తారని.. ఆయన కూతురుగా శ్రీలీల నటించనున్నారని దర్శకుడు ఇటీవల ఓ ఇంటర్వ్యూలో తెలిపారు.

ఇది హీరో క్యారెక్టరైజేషన్ మీద కథ అని.. బాలయ్య తో సరికొత్త ప్రయోగం చేయబోతున్నట్లు అనిల్ చెప్పారు. ఇప్పటివరకు నటసింహాన్ని ఎవ్వరూ చూడని కొత్త కోణంలో చూపించబోతున్నట్లు పేర్కొన్నారు. త్వరలోనే ఈ చిత్రానికి సంబంధించిన అన్ని వివరాలు వెల్లడి కానున్నాయి. ఈ సినిమా 2022 ద్వితీయార్థంలో ప్రేక్షకుల ముందుకు వచ్చే అవకాశం ఉంది.