'వకీల్ సాబ్' కాంబోలో మరో సినిమా లేనట్లేనా..?

పవర్ స్టార్ పవన్ కళ్యాణ్ సినిమాల్లోకి రీ ఎంట్రీ ఇవ్వాలని నిర్ణయించుకొని బ్యాక్ టూ బ్యాక్ ప్రాజెక్ట్స్ లైన్ లో పెట్టాడు. దీంతో ఫ్యాన్స్ ఫుల్ ఖుషీ అయినప్పటికీ ముందుగా 'పింక్' రీమేక్ తో రావడం పట్ల నిరాశ చెందారు. అందులోనూ స్టార్ డైరెక్టర్ ని కాకుండా వేణు శ్రీరామ్ తో సినిమా కమిటవడం ఏంటని అందరూ ఆలోచించారు. అయితే 'వకీల్ సాబ్' విడుదలైన తర్వాత అభిమానుల అనుమానాలన్నీ పటాపంచలయ్యాయి. ఈ సినిమా విజయంలో కీలక పాత్ర పోషించిన వేణు శ్రీరామ్.. ఇందులో పవన్ ని ప్రజెంట్ చేసిన విధానానికి ఫ్యాన్స్ ఫిదా అయ్యారు. దీంతో వేణు ని పొగడ్తలతో ముంచెత్తుతూ పవర్ స్టార్ తో మరో సినిమా చేయాలని కోరుకున్నారు.

ఈ నేపథ్యంలో వేణు శ్రీరామ్ తో మరో సినిమా చేయడానికి పవన్ రెడీ అయ్యారని.. తన కోసం మ‌రో క‌థ రెడీ చేయాల్సిందిగా స్వ‌యంగా వేణుతో చెప్పిన‌ట్లుగా టాక్ వచ్చింది. దీనికి తోడు 'వకీల్ సాబ్' సక్సెస్ మీట్ లో వేణు మంచి స్క్రిప్ట్ రెడీ చేస్తే మరో ప్రాజెక్ట్ కోసం పవన్ కళ్యాణ్ ని కలుస్తామని దిల్ రాజు చెప్పారు. దీంతో పవన్ - వేణు కాంబోలో వెంటనే రెండో సినిమా ఉంటుందని.. వచ్చే ఏడాది సెట్స్ పైకి వెళ్తుందని వార్తలు వచ్చాయి. అయితే మనకందిన సమాచారం ప్రకారం ప్రస్తుతానికి పవన్ మరే కొత్త ప్రాజెక్ట్ కి గ్రీన్ సిగ్నల్ ఇవ్వలేదట. ఇప్పటికే కమిట్ అయిన సినిమాలు పూర్తి చేసిన తర్వాతే కొత్తవాటి గురించి ఆలోచన చేస్తాడట. దీనిని బట్టి చూస్తే ఇప్పట్లో పవర్ స్టార్ - డైరెక్టర్ వేణు కాంబినేషన్ లో మరో సినిమా ఉండకపోవచ్చని సినీ వర్గాల్లో అనుకుంటున్నారు.