ఆ విధంగా ఇషాకు పోష్టరేశారు!!

అప్పుడెప్పుడో 1998లో వచ్చిన 'చంద్రలేఖ' సినిమాతో హీరోయిన్ గా కనిపించింది ఇషా కొప్పికర్. ఆ తరువాత ఇక్కడ ప్రేమతో రా అనే సినిమా తప్పిస్తే ఇంకోటి చేయలేదు కాని.. బాలీవుడ్ లో మాత్రం బాగానే కుమ్మేసింది. ఇక పెళ్ళయి ఒక బిడ్డ పుట్టాక.. 40 ఏళ్ళ వయస్సులో ఇప్పుడు సినిమాల్లో రీ ఎంట్రీ ఇవ్వడానికి తిరిగి తెలుగు సినిమానే ఎన్నుకుంది తెలుసా.

నిఖిల్ హీరోగా సుధీర్ వర్మ డైరక్షన్లో రూపొందుతున్న ''కేశవ'' సినిమాతో ఇప్పుడు ఇషా తిరిగి దాదాపు 7 ఏళ్ల తరువాత సినిమాల్లోకి వస్తోంది. ఈ సినిమాలో అమ్మడు ఒక పోలీస్ ఆఫీసర్ క్యారెక్టర్ చేస్తోంది. ఈ సినిమాలో ఆ రోల్ ఎలా ఉండబోతోందో తెలియదు కాని.. ఇవాళ ఇంటర్నేషనల్ ఉమెన్స్ డే సందర్భంగా మనోళ్ళు ఆమె ఫోటోతో ఒక స్పెషల్ పోస్టర్ రిలీజ్ చేశారు. మామూలుగా సైడ్ క్యారెక్టర్లతో రి ఎంట్రీ ఇస్తున్నప్పుడు పోస్టర్లకు ఎక్కడం కష్టమే కాని.. ఇషా మాత్రం.. బాగానే పోష్టర్లో పడింది మాష్టారూ.

మొత్తానికి రీ-ఎంట్రీ సినిమాలు చేసి ఇలా సోలో పోస్టర్ వేయించుకోలేకపోయిన చాలామంది హీరోయిన్లు ఇప్పుడు కాస్త జెలస్ ఫీలవ్వాల్సిందే మరి. అదే విధంగా ఉమెన్స్ డే సందర్భంగా ఇలా స్పెషల్ పోస్టర్ వేసినందుకు మనం కేశవ టీమ్ ను కూడా అభినందించాల్సిందే.

Like Us on Facebook : https://www.facebook.com/Tupakidotcom/