ఇష్క్‌... తెలుగులోనే మొదటి సారి!

ఇంద్ర సినిమా బుడ్డోడు తేజ సజ్జా హీరోగా ఇప్పటికే జాంబీ రెడ్డి సినిమాతో పాజిటివ్ రెస్పాన్స్ దక్కించుకున్నాడు. హీరోగా మొదటి సినిమాతో మంచి మార్కులు దక్కించుకున్న తేజ సజ్జా తక్కువ గ్యాప్‌ లోనే ఇష్క్‌ సినిమా తో ప్రేక్షకుల ముందుకు వచ్చేందుకు సిద్దం అయ్యాడు. ఇష్క్‌.. ప్రేమ కథ కాదు అంటూ రూపొందిన ఈ చిత్రాన్ని ఈ వారం ప్రేక్షకుల ముందుకు తీసుకు వచ్చేందుకు ఏర్పాట్లు చేస్తున్నారు. కరోనా సెకండ్‌ వేవ్‌ భయంతో పెద్ద సినిమాలు విడుదల కావడం లేదు. దాంతో ఈ సినిమాకు కలిసి వచ్చే అవకాశాలు ఉన్నాయంటూ ఇండస్ట్రీ వర్గాల వారు అభిప్రాయం వ్యక్తం చేస్తున్నారు.

ఇక ఈ సినిమా ప్రీ రిలీజ్ కార్యక్రమం తాజాగా జరిగింది. వకీల్‌ సాబ్‌ దర్శకుడు వేణు శ్రీరామ్‌.. నారా రోహిత్‌ మరియు సందీప్‌ కిషన్‌ లు ప్రత్యేక అతిథులుగా ఈ కార్యక్రమంలో పాల్గొన్నారు. ఈ సందర్బంగా ఇష్క్‌ చిత్ర యూనిట్‌ సభ్యులకు ఆల్ ది బెస్ట్‌ చెప్పడంతో పాటు సినిమా ట్రైలర్‌ చూస్తుంటే తప్పకుండా ఇదో మంచి కాన్సెప్ట్‌ ఓరియంటెడ్‌ సినిమా అనిపిస్తుంది అంటూ అభిప్రాయం వ్యక్తం చేశారు. మెగా సూపర్‌ గుడ్‌ ఫిల్మ్స్ వంటి బిగ్గెస్ట్‌ బ్యానర్‌ లో ఈ సినిమా రూపొందిన నేపథ్యంలో ఇండస్ట్రీ వర్గాల్లో కూడా మంచి అంచనాలు అయితే ఉన్నాయి.

ప్రీ రిలీజ్‌ కార్యక్రమం సందర్బంగా హీరో తేజ మాట్లాడుతూ... మెగా సూపర్‌ గుడ్‌ ఫిల్మ్స్ వారు స్టార్‌ హీరోలతో సినిమాలు చేసే అవకాశం ఉన్నా కూడా నాతో రీ ఎంట్రీ ఇవ్వాలనుకోవడం నా అదృష్టం. ఈ కార్యక్రమానికి వంద కోట్ల సినిమా వకీల్‌ సాబ్‌ ను తెరకెక్కించిన దర్శకుడు వేణు శ్రీరామ్‌ రావడం చాలా సంతోషంగా ఉంది. తప్పకుండా ఈ సినిమా ప్రేక్షకుల అంచనాలను అందుకునేలా ఉంటుంది. ఇక ఈ సినిమా అన్ని విధాలుగా కొత్తగా ఉంటుందని చెప్పుకొచ్చాడు. ఇలాంటి సబ్జెక్ట్‌ తెలుగులో రావడం ఇదే తొలిసారి అంటూ తేజ చెప్పుకొచ్చాడు. ప్రతి ఒక్క ఫ్యామిలీ మెంబర్‌ కు ఇది నచ్చే విధంగా ఉంటుందని ఆయన నమ్మకంగా చెబుతున్నాడు.