బ్లాక్ బస్టర్ ఫీలింగ్ అంటే ఇది!

'ఇస్మార్ట్ శంకర్' విజయంతో టీమ్ అంతా ఫుల్లు సెలెబ్రేషన్స్ లో మునిగిపోయారు. చాలా రోజుల నుండి ఎదురు చూస్తున్న సక్సెస్ అందరికీ ఒక్కసారిగా రావడంతో పూరి.. ఛార్మీల ఉత్సాహం మామూలుగా లేదు. అయితే ఈ వేడుకల్లో హీరో రామ్ పాలు పంచుకోలేకపోయాడు. సినిమా రిలీజ్ కు ముందే రామ్ ఫారెన్ ట్రిప్ కు వెళ్ళిన సంగతి తెలిసిందే. దీంతో ప్రమోషన్స్.. సక్సెస్ టూర్ల బాధ్యత అంతా పూరి ఛార్మీనే తీసుకున్నారు. తాజాగా రామ్ వెకేషన్ నుంచి తిరిగి రావడంతో మరోసారి ఇస్మార్ట్ సెలబ్రేషన్స్ జరిగాయి.

పూరి 'కేవ్' లో నిన్న రాత్రి జరిగిన ఈ సెలబ్రేషన్స్ లో రామ్ పాల్గొనడం టీమ్ మొత్తానికి కొత్త ఊపును తీసుకొచ్చింది. పూరి.. ఛార్మీ.. రామ్ కలిసి మోడరన్ స్టైల్ లో షాంపేన్ బాటిల్ మూత తీసి.. షేక్ చేసి నురగ వచ్చేలా పొంగించారు. 'ఇస్మార్ట్ శంకర్' టీమ్ సభ్యులు ఉస్తాద్ ఇస్మార్ట్ శంకర్ అంటూ అరుస్తూ ఉంటే ఈ షాంపేన్ పొంగించే తతంగం సాగింది. ఈ వీడియోను తన ట్విట్టర్ ఖాతా ద్వారా షేర్ చేసిన ఛార్మీ "ఉస్తాద్ రామ్ ఇస్మార్ట్ శంకర్ వేడుకలకు కొత్త ఎనర్జీ తీసుకొచ్చాడు. ఇస్మార్ట్ బ్లాక్ బస్టర్ ను ఇప్పుడు నిజంగా ఫీల్ అవుతున్నాను" అంటూ ట్వీట్ చేసింది.

'ఇస్మార్ట్ శంకర్' నిర్మాతలకే కాకుండా బయ్యర్లకు.. డిస్ట్రిబ్యూటర్లకు లాభాల పంట పండించింది. గత కొంతకాలంగా రామ్ సినిమాలేవీ భారీ కలెక్షన్స్ సాధించలేదు. ఈ చిత్రంతో హీరో రామ్ స్టామినా మరోసారి ఋజువయింది. డైరెక్టర్ గా పూరి పరిస్థితి కూడా అంతే. చాలా కాలం తర్వాత ఆయనకు హిట్ రావడం అభిమానులను సంతోషంలో ముంచెత్తింది. హీరోయిన్లు నిధి అగర్వాల్.. నభా నటేష్ ఇద్దరి కెరీర్లలో ఈ సినిమా ఫస్ట్ హిట్ గా నిలిచింది.