టీజర్ టాక్ : ఊర మాస్ శంకర్

ఇవాళ ఎనర్జిటిక్ స్టార్ రామ్ పోతినేని బర్త్ డే. ఈ సందర్భంగా పూరి జగన్నాథ్ దర్శకత్వంలో రూపొందుతున్న ఐస్మార్ట్ శంకర్ టీజర్ ను పుట్టినరోజు కానుకగా విడుదల చేశారు. కథను ఎక్కువగా రివీల్ చేయకుండా శంకర్ క్యారెక్టరైజేషన్ ని మాత్రమే హై లైట్ చేసేలా కట్ చేసిన తీరు అభిమానులకు మంచి గూస్ బంప్స్ ఇచ్చేలా ఉంది. విషయానికి వస్తే చార్మినార్ అడ్డాగా ఉండే శంకర్(రామ్)కు భయమంటే తెలియదు. ఏదైనా సరే ముక్కుసూటిగా చెప్పడం తన దందాకు ఎవరు అడ్డు వచ్చినా చితగొట్టడం అతని స్టైల్.

ఎవరైనా కవ్విస్తే శంకర్ కు చిరాకు. బస్తీలో శంకర్ దే హల్చల్. అతనికో లవ్ కూడా ఉంటుంది. శంకర్ మాఫియాకు సైతం సవాల్ గా మారతాడు. అక్కడి నుంచి ప్రమాదాలు సవాళ్ళు వెన్నంటి వస్తాయి. వీటిని ఎలా అధిగమించాడు అనేదే ఐస్మార్ట్ శంకర్ కథ

టీజర్ చివర్లో శంకర్ చెప్పే డైలాగ్ ఒకటుంది. నాతో కిరికిరి అంటే పోశమ్మ గుడి ముంగట పొట్టేలును కట్టేసినట్టే అని. దీన్ని బట్టి ఐస్మార్ట్ శంకర్ ఎలా ఉండబోతోందో క్లూ ఇచ్చేశాడు పూరి. రామ్ ఎన్నడూ చూడని ఊరమాస్ అవతారంలో అదరగొట్టాడు. లుక్స్ విషయంలో తీసుకున్న కేర్ మంచి ఫలితాన్ని ఇచ్చింది. పూరికి మాత్రమే సాధ్యమయ్యే ట్రేడ్ మార్క్ హీరోయిజం చాలా రోజుల తర్వాత ఐస్మార్ట్ శంకర్ లో కనిపిస్తోంది.

థీమ్ సాంగ్ రూపంలో మణిశర్మ పనితనం బాగా వినిపించింది. బర్త్ డే టీజర్ కాబట్టి హీరో తప్ప హీరొయిన్లతో సహా ఇంకే పాత్ర రివీల్ కాకుండా జాగ్రత్త పడ్డారు. మొత్తానికి రామ్ ఫాన్స్ తో పాటు పూరి ఫ్యాన్స్ ఎప్పుడెప్పుడా అని ఎదురుచూసేలా ఐస్మార్ట్ శంకర్ టీజర్ తోనే మంచి బోణీ కొట్టేసింది. విడుదల తేది ఇంకా ఖరారు కావాల్సిన ఐస్మార్ట్ శంకర్ లో నిధి అగర్వాల్ తో నభ నటేష్ హీరొయిన్లుగా నటిస్తున్నారు