పద్మవ్యూహంలో సుకుమారుడు

మహేష్ బాబుతో ప్రాజెక్ట్ రద్దు కావడం సుకుమార్ ను బాగా ఇబ్బందికరమైన పరిస్థితుల్లోకి నెట్టడం వాస్తవం. రంగస్థలం ఈ నెలాఖరుకు ఏడాది పూర్తి చేసుకుంటుంది. ఇప్పటిదాకా కొత్త సినిమా షూటింగ్ సుకుమార్ మొదలుపెట్టలేకపోయాడు. దానికి కారణం మహేష్ మూవీనే అన్నది ఓపెన్ సీక్రెట్. అయితే స్క్రిప్ట్ విషయంలో ఏకాభిప్రాయం కుదరకపోవడం వల్లే తాను చేయలేకపోతున్నట్టు మహేష్ పబ్లిక్ గా చెప్పేశాడు.

కాని ఇలా చెప్పడం వెనుక కారణం కేవలం అల్లు అర్జున్-సుక్కుల కాంబో ప్రకటన రావడం వల్లే అని ఇప్పటికీ అధిక శాతం నమ్ముతున్నారు. అదలా ఉంచితే సరైన ప్లానింగ్ లేక కేవలం ప్రకటనలు గుప్పించడం ద్వారా ఇరుక్కుపోయిన మైత్రి సంస్థ డ్యామేజ్ రిపేర్ కు పూనుకుంది. అందులో భాగంగానే మహర్షి సెట్ లో ప్రత్యేకంగా మహేష్ సుక్కుల మీటింగ్ ఏర్పాటు చేయించిందట

అయితే ఇద్దరి మధ్య ఏ విషయాలు చర్చకు వచ్చాయి అనే విషయాలు ఇంకా బయటికి రాలేదు. సుకుమార్ చెప్పిన వెర్షన్ కు ఒకవేళ మహేష్ నిజంగా కూల్ అయినా ఇప్పటికిప్పుడు సినిమాను చేసే పరిస్థితిలో లేడు. మహర్షి విడుదలయ్యాక అనిల్ రావిపూడి ప్రాజెక్ట్ మీద ఫోకస్ చేయాల్సి ఉంటుంది. అది పూర్తయ్యి థియేటర్లకు వచ్చే సంక్రాంతి దాకా ప్రిన్స్ ఇక దేని గురించి ఎక్కువ ఆలోచించడు.

ఆలోపు త్రివిక్రమ్ అల్లు అర్జున్ ల సినిమా ఫినిష్ అయిపోయి ఉంటుంది కాబట్టి సుకుమార్ బన్నీ కోసం ఫుల్ స్క్రిప్ట్ తో రెడీగా ఉండాలి. మధ్యలో వచ్చే తక్కువ గ్యాప్ లో సుకుమార్ మహేష్ కోసం కొత్త కథ వండటం జరిగే పని కాదు. కేవలం మిస్ అండర్ స్టాండింగ్ లో తొలగించుకోవడం కోసం కలవడమే కాని సుకుమార్ మహేష్ బాబు కాంబో ఇప్పట్లో రావడం కష్టమే అని ఇన్ సైడ్ టాక్