ఐటం సాంగ్ సెంటిమెంట్ వ‌ర్క‌వుట్ అవుతుందా?

టాలీవుడ్ లో వున్న స్టార్ హీరోల్లో కొంత మందికి ఐట‌మ్ సాంగ్ సెంటిమెంట్‌. అది క‌రెక్ట్ ప్లేస్ లో ప‌డిందా బొమ్మ బ్లాక్ బ‌స్ట‌రే. ఈ సెంటిమెంట్ ని మాస్ మ‌హారాజా ర‌వితేజ సెంటిమెంట్ గా ఫాలోఅవుతున్నారు. గ‌త ఏడాది `క్రాక్‌` మూవీతో ట్రాక్ లోకి వ‌చ్చారు. గోపీచంద్ మ‌లినేని తెర‌కెక్కించిన ఈ యాక్ష‌న్ డ్రామా బాక్సాఫీస్ వ‌ద్ద బ్లాక్ బ‌స్ట‌ర్ హిట్ గా నిలిచి యాభై శాతం ఆక్యుపెన్సీలోనూ రికార్డు స్థాయి వ‌సూళ్ల‌ని రాబ‌ట్టింది. శృతిహాస‌న్ కు కూడా ఈ మూవీ మంచి క‌మ్ బ్యాక్ ఫిల్మ్ గా నిలిచి కెరీర్ ని గాడిలోప‌డేసింది.

ఇందులో అస్స‌ర‌రాణితో క‌లిసి ర‌వితేజ‌పై చిత్ర‌క‌రించిన క్ల‌బ్ సాంగ్ `భూమ్ బ‌ద్ద‌ల్` ఐట‌మ్ నంబ‌ర్ పేరుకు త‌గ్గ‌ట్టే థియేట‌ర్లు ద‌ద్ద‌రిల్లిపోయేలా చేసింది. ఈ ఐట‌మ్ సాంగ్ సెంటిమెంట్ లో మాస్ మ‌హారాజా త‌న తాజా చిత్రం `రామారావు ఆన్ డ్యూటీ`లోనూ అదిరిపోయే ఐటమ్ నెంబ‌ర్ ని సెట్ చేసుకున్నారు. బాలీవుడ్ హాటీ, గందీ బాత్ వంటి సిరీస్ ల‌తో హాట్ టాపిక్ గా మారిన అన్వేషీ జైన్ తో `నా పేరు సీసా` అంటూ సాగే ఐట‌మ్ సాంగ్ ని సెట్ చేశారు.

రీసెంట్ గా రిలీజ్ చేసిన ఈ లిరిక‌ల్ వీడియో యూట్యూబ్ లో , సోష‌ల్ మీడియాలో దుమ్ముదులిపేస్తోంది. ఈ పాట‌లో ర‌వితేజ హాఫ్ షర్ట్, వైట్ లుంగీ ధ‌రించి అన్వేషీజైన్ తో క‌లిసి అద‌రిపోయే స్టెప్పులేశారు. ఈ పాట థియేట‌ర్లలో ఆడియ‌న్స్ ని ఓ రేంజ్ లో ఎంట‌ర్ టైన్ చేయ‌డం ఖాయం అని చెబుతున్నారు. అయితే ఈ పాట కోసం జ‌నం థియేట‌ర్ల‌కు వ‌స్తారా అన్న‌ది ఇప్ప‌డు నెట్టింట చ‌ర్చ జ‌రుగుతోంది. ఈ పాట‌పై కామెంట్ లు కూడా వినిపిస్తున్నాయి.

ఈ పాట‌లో అన్వేషీజైన్ త‌న భారీ అందాల‌తో క‌వ్విస్తోంది. ఈ త‌ర‌హా పాట కోసం, బీగ్రేడ్ అందాల విందు కోసం స‌గ‌టు ప్రేక్ష‌కుడు థియేట‌ర్ల‌కు వ‌చ్చే రోజులు ఇప్ప‌డు లేవ‌ని, సెల్ ఫోన్ వ‌చ్చేశాక అర‌చేతిలో ప్ర‌పంచం క‌నిపిస్తోంద‌ని, బిసి సెంట‌ర్ల ఆడియ‌న్స్ కూడా ఇప్ప‌డు ఈ త‌ర‌హా పాట‌ల‌పై ఆస‌క్తిని చూపించ‌డం లేద‌ని నెట్టింట కామెంట్ లు వినిపిస్తున్నాయి.

కానీ కంటెంట్ వున్న సినిమాకు ఇలాంటి ఐట‌మ్ నంబ‌ర్ ప్ర‌త్యేక ఆక‌ర్ష‌ణ‌గా నిలుస్తుంద‌ని ఇంత వ‌ర‌కు చాలా సినిమాలు నిరూపించాయ‌ని, ఆ కోవ‌లో `రామారావు ఆన్ డ్యూటీ` కూడా ఆక‌ట్టుకుంటుంద‌ని చెబుతున్నారు. జూలై 22న భారీ స్థాయిలో రిలీజ్ అవుతున్న ఈ మూవీ ఏ మేర‌కు ఎంట‌ర్ టైన్ చేస్తుందో వేచి చూడాల్సిందే.