అతడికి చాలా పెద్ద పరీక్షే!!

తొలి సినిమాకు హిట్టు కొట్టడం కంటే కూడా ఓ ఫ్లాప్ తర్వాత హిట్టు కొట్టి నిరూపించుకోవడం పెద్ద సవాల్. ఐతే సంపత్ నంది మాత్రం డిఫరెంట్ ఛాలెంజ్ తీసుకున్నాడిప్పుడు. అతడి తొలి సినిమా హిట్టు, రెండో సినిమా కూడా పెద్ద హిట్టు. అయినప్పటికీ మూడో సినిమాకు తనేంటో రుజువు చేసుకోవాల్సిన స్థితిలోనే ఉన్నాడు ఈ కుర్ర డైరెక్టర్.

‘ఏమైంది ఈవేళ’ లాంటి చిన్న సినిమాతో దర్శకుడిగా అరంగేట్రం చేసిన వాడు రెండో సినిమాకే రామ్ చరణ్ ను డైరెక్ట్ చేసే అవకాశం దక్కించుకోవడం చాలామందికి ఆశ్చర్యం కలిగించింది. ఐతే ఆ సినిమాతో హిట్టుకొట్టి పవన్ కళ్యాణ్‌ తో సినిమా చేసే ఛాన్స్ కొట్టేసి మరింతగా జనాల్ని ఆశ్చర్యపోయేలా చేశాడు సంపత్. కానీ ఆ అవకాశం నిలవలేదు. రెండేళ్లు ‘గబ్బర్ సింగ్’ ప్రాజెక్టు మీద పని చేశాక బయటికి వచ్చేయాల్సిన పరిస్థితి.

కొంతమంది సంపత్ మీద జాలి చూపిస్తే.. ఇంకొంతమంది తక్కువ చేసి మాట్లాడారు. సంపత్ పనితీరు నచ్చలేదు కాబట్టే పవన్ పంపించేశాడు అన్నారు. అలాంటి వాళ్లందరికీ ఇప్పుడు తనేంటో రుజువు చేయాల్సిన స్థితిలో ఉన్నాడు సంపత్. ‘బెంగాల్ టైగర్’ అతడికి చాలా పెద్ద పరీక్షే. ఐతే ఈ పరీక్షలో పాసవడానికి బాగానే కష్టపడ్డట్లున్నాడు సంపత్. మాస్ మసాలాలన్నీ దట్టించి సినిమా తయారు చేశాడు ట్రైలర్ చూస్తేనే అర్థమవుతుంది. రవితేజ మార్కు మాస్ అంశాలు పుష్కలంగా ఉన్నట్లున్నాయి. హీరోయిన్ల అందాలు, కమెడియన్ల హంగామా.. రిచ్ ప్రొడక్షన్ వాల్యూస్.. మొత్తంగా చూస్తే ‘బెంగాల్ టైగర్’ హడావుడి బాగానే కనిపిస్తోంది. మరి తన సామర్థ్యాన్ని శంకించిన వాళ్లందరికీ ఈ సినిమాతో సంపత్ తనేంటో రుజువు చేస్తాడేమో చూడాలి.