సుకుమార్ ఎంత వెరైటీనో చెప్పిన ఆ నటుడు

స్టార్ డైరెక్టర్ సుకుమార్ సినిమాల్లాగే ఆయన పనితీరు కూడా చాలా విలక్షణంగా ఉంటుందని ఆయనతో పని చేసిన వాళ్లు చెబుతుంటారు. సుకుమార్ సినిమా సెట్లో డైలాగులు రాయించడం.. అప్పటికప్పుడు సన్నివేశాన్ని ఇంప్రొవైజ్ చేయించడం చేస్తుంటాడని అంటుంటారు. కథ కూడా ఎవరికీ పూర్తిగా చెప్పడని.. క్యారెక్టరైజేషన్లు.. సన్నివేశాలు మాత్రం వివరించి రంగంలోకి దిగుతుంటాడని కూడా చెబుతుంటారు. సుక్కు స్టైల్ ఎలా ఉంటుందనే విషయంపై తాజాగా కమెడియన్ జబర్దస్త్ మహేష్ ఆసక్తికర సంగతులు చెప్పడు. ‘రంగస్థలం’లో చరణ్ అసిస్టెంటుగా కీలక పాత్రలో అదరగొట్టేశాడు మహేష్. అతడి పాత్రపై.. నటనపై ప్రశంసలు కురిశాయి.

ఈ నేపథ్యంలో ఒక ఇంటర్వ్యూలో మాట్లాడుతూ.. ‘‘రంగస్థలంలో నేను చేసిన పాత్రకు సంబంధించి అందరూ తెగ పొగుడుతున్నారు. ఐతే ఆ పొగడ్తలు వింటుంటే నా కళ్ల ముందు సుకుమార్ గారే కనిపిస్తున్నారు. ఆయన వల్లే నాకింత గుర్తింపు వచ్చింది. ఆయన చాలా విలక్షణమైన దర్శకుడు. సినిమాలో నా పాత్ర గురించి ఆయన ముందు ఏమీ చెప్పలేదు. కథ కూడా వెల్లడించలేదు. షూటింగుకి వెళ్తే ఏ రోజుకు ఆ రోజు సీన్ చెప్పేవారు. ముందే కథ.. పాత్ర గురించి పూర్తిగా తెలిస్తే ప్రి నోషన్స్ తో నటిస్తామన్నది ఆయన ఉద్దేశం. అందుకే ఏ రోజుకు ఆ రోజు కొత్తగా.. సహజంగా నటించాలనే ఉద్దేశంతో ముందు ఏమీ చెప్పేవాళ్లు కాదు. అందుకే సినిమాలో అన్ని పాత్రలూ అంత బాగా.. సహజంగా వచ్చాయి. నా పాత్ర పండటానికి కూడా అదే కారణం’’ అని మహేష్ తెలిపాడు.