కరోనా సోకిందన్న వార్తలపై సూపర్‌ స్టార్‌ స్పందన

చైనాతో పాటు పలు ఆసియా దేశాలు ఇంకా ఇతర దేశాలను కూడా వణికిస్తున్న కరోనా వైరస్‌ సినీ ప్రముఖులను కూడా వదిలి పెట్టలేదని.. హాలీవుడ్‌ స్టార్‌ హీరో జాకీచాన్‌ కు కూడా కరోనా వైరస్‌ సోకిందని గత రెండు మూడు రోజులుగా అంతర్జాతీయ మీడియాలో ప్రముఖంగా వార్తలు వస్తున్నాయి. హంకాంగ్‌ లో ప్రారంభం అయిన ఈ వార్తలు సోషల్‌ మీడియా కారణంగా ప్రపంచ వ్యాప్తంగా వైరల్‌ అయ్యాయి. కొన్ని గంటల్లోనే ఈ వార్తలు వైరల్‌ అవ్వడంతో జాకీ చాన్‌ కు పెద్ద ఎత్తున పరామర్శలు వెళ్లువెత్తాయి.

జాకీచాన్‌ బాగుండాలంటూ సోషల్‌ మీడియాలో ఆయన అభిమానులు గెట్‌ వెల్‌ సూన్‌ అంటూ పోస్ట్‌ లు పెట్టడంతో పాటు దేవుడిని ప్రార్థించడం మొదలు పెట్టారు. ఈ సమయంలోనే ఆయన స్పందించాడు. తనకు కరోనా వైరస్‌ సోకినట్లుగా మీడియాలో వస్తున్న వార్తలు పూర్తిగా అవాస్తవం అంటూ ప్రకటించాడు. సోషల్‌ మీడియా ద్వారా తన ఆరోగ్య పరిస్థితిపై క్లారిటీ ఇచ్చాడు.

ఇలాంటి పుకార్లను నమ్మి ఆందోళన చెందనక్కర్లేదని.. నేను పూర్తి జాగ్రత్తలు తీసుకుంటున్నాను మీరు కూడా కరోనా విషయంలో జాగ్రత్తలు వహించండి అంటూ పిలుపునిచ్చాడట. మొత్తానికి సెలబ్రెటీలకు ఇలాంటి పుకార్లు కూడా తప్పడం లేదు. కరోనా వైరస్‌ బారిన ఇప్పటి వరకు ఏ సెలబ్రెటీ కూడా పడలేదు. పడకూడదనే కోరుకుందాం.