మెగా హీరో ఫాదర్ గా.. క్రేజీ విలన్

ప్రస్తుతం సౌతిండియా మొత్తంలో ఫుల్లు బిజీగా ఉన్న యాక్టర్ అంటే.. జగపతిబాబు తర్వాతే ఎవరైనా. అన్నేసి సినిమాలు మనోడి ఖాతాలో ఉన్నాయి. ఇంకా అనేక ఆఫర్లు వచ్చిపడుతున్నాయి. అయితే కేరక్టర్ల ఎంపిక విషయంలో ఏ మాత్రం కాంప్రమైజ్ కాకుండా.. తన స్థాయిని మరింతగా పెంచే సినిమాలకు మాత్రమే సైన్ చేస్తున్నాడు జగపతి.

టాలీవుడ్ టాప్ హీరోలతో ఢీ అంటే ఢీ అనే విలన్ రోల్స్ తో పాటు.. తండ్రి కేరక్టర్లతో కూడా జగపతిబాబు ఆకట్టుకుంటున్నాడు. ఇప్పుడు ఓ మెగా హీరో సినిమాలో జేబీకి ఫాదర్ రోల్ ఆఫర్ వచ్చింది. ప్రస్తుతం తిక్క షూటింగ్ లో ఉన్న తేజు.. ఇది పూర్తి కాగానే గోపీచంద్ మలినేని దర్శకత్వంలో కొత్త మూవీ ప్రారంభించనున్నాడు. ఇందులో హీరో తండ్రి పాత్రకు చాలా ప్రాధాన్యత ఉందని .. ఈ రోల్ కి సంబంధించిన పూర్తి నేరేషన్ ని జగపతిబాబుకి చెప్పాడట దర్శకుడు. ఆ పాత్ర స్వభావం నచ్చడంతో.. మూవీ చేసేందుకు జగపతి ఇంట్రెస్ట్ చూపించాడని అంటున్నారు.

ఇంకా అగ్రిమెంట్ సైన్ చేయకపోయినా.. తేజుకి తండ్రిగా జగపతి బాబు నటించడం ఖాయంగా కనిపిస్తోంది. గతంలో పిల్లా నువ్వు లేని జీవితంలో కూడా వీళ్లిద్దరూ కలిసి నటించారు. వీరి కాంబినేషన్ లో వచ్చే సీన్స్ ఆ మూవీకి హైలైట్ గా నిలిచిన విషయం తెలిసిందే. ప్రస్తుతం కళ్యాణ్ రామ్ ఇజంలో నటిస్తున్న జగపతిబాబు.. ఇది పూర్తయ్యాక తేజు సినిమాలో జాయిన్ అయ్యే అవకాశాలున్నాయి.