జై లవకుశ టీజర్.. రెడీనా?

అభిమానులు అడగడాని కంటే ముందు విందు వడ్డించేస్తున్నాడు జూనియర్ ఎన్టీఆర్. ‘జై లవకుశ’ సినిమా ప్రారంభమై నెల రోజులు కాకముందే.. అభిమానులు ఏ అంచనాలతో లేని సమయంలోనే శ్రీరామనవమికి టైటిల్ లోగో మోషన్ పోస్టర్ రిలీజ్ చేసి ఆనందం పంచాడు తారక్. ఆపై తన పుట్టిన రోజుకు ఒకటికి రెండు ఫస్ట్ లుక్స్ రిలీజ్ చేసి వాళ్లను సంతోషంలో ముంచెత్తాడు. త్వరలోనే అభిమానులకు మరో సర్ప్రైజ్ ఇవ్వబోతున్నట్లు సమాచారం. ఈ నెలలోనే ‘జై లవకుశ’ ఫస్ట్ టీజర్ లాంచ్ చేయబోతున్నట్లు సమాచారం.

రంజాన్ కానుకగా జూన్ 21న టీజర్ లాంచ్ కోసం సన్నాహాలు జరుగుతున్నట్లు తెలుస్తోంది. తెలుగు సినిమాలకు సంబంధించి రంజాన్ కానుకగా టీజర్ లాంటిది రిలీజ్ చేసే ఆనవాయితీలేం లేవు. ఐతే ఈసారి ఆ పండక్కి తన టీజర్ లాంచ్ చేయడం ద్వారా కొత్త సంప్రదాయానికి తెర తీయాలని ఎన్టీఆర్ అండ్ టీం భావిస్తున్నట్లు సమాచారం. రంజాన్ సమయానికి.. సినిమా విడుదలకు సరిగ్గా వంద రోజుల కౌంట్ డౌన్ ఉంటుంది. కాబట్టి టీజర్ విడుదలకు అది సరైన టైమింగే అవుతుందని భావిస్తున్నారు. ఎన్టీఆర్ కెరీర్లో బిగ్గెస్ట్ హిట్టుగా నిలిచిన ‘జనతా గ్యారేజ్’ గత ఏడాది ఏ తేదీకి రిలీజైందో.. ఈ ఏడాది అదే డేటుకి.. అంటే సెప్టెంబరు 1న ‘జై లవకుశ’ను విడుదల చేయాలని భావిస్తున్నారు. ఎన్టీఆర్ అన్నయ్య నందమూరి కళ్యాణ్ రామ్ నిర్మిస్తున్న ఈ చిత్రానికి బాబీ దర్శకత్వం వహిస్తున్న సంగతి తెలిసిందే.

Like Us on Facebook : https://www.facebook.com/Tupakidotcom/