గెట్ రెడీ.. ‘జై లవకుశ’ ఆడియో ఆరోజే

‘జై లవకుశ’ టీం స్పీడు మామూలుగా లేదు. మొదట్నుంచి మాంచి వేగం చూపిస్తోంది ఈ చిత్ర యూనిట్. సినిమా ప్రారంభమైన నెల రోజుల్లోనే టైటిల్ లోగో మోషన్ పోస్టర్ లాంచ్ చేశారు. ఇంకో నెలన్నరకే ఒకటికి రెండు ఫస్ట్ లుక్స్ వదిలారు. గత నెలలోనే ఫస్ట్ టీజర్ కూడా వచ్చేసింది. అన్నీ కూడా మంచి స్పందన రాబట్టుకున్నాయి. మూడు టీజర్లలో భాగంగా రెండోది ఇంకో పది రోజుల్లోపే రాబోతున్నట్లుగా వార్తలొస్తున్నాయి. దీంతో పాటు ఆడియో వేడుకకు కూడా సన్నాహాలు మొదలైపోవడం విశేషం. సినిమా విడుదలకు నెల రోజుల కంటే ముందే ‘జై లవకుశ’ ఆడియో వేడుక చేయడానికి ఏర్పాట్లు జరుగుతున్నట్లు సమాచారం.

తాజా సమాచారం ప్రకారం ‘జై లవకుశ’ ఆడియో ఆగస్టు 12న శనివారం విడుదలవుతుందట. ఈ చిత్రం కోసం దేవిశ్రీ ప్రసాద్ ఇప్పటికే పాటల కంపోజిషన్ పూర్తి చేసినట్లు సమాచారం. త్వరలోనే ఆడియో రికార్డింగ్ జరుగుతుందట. ముందు ఆడియో రిలీజ్ చేసి.. ఆ తర్వాత మిగతా ప్రమోషన్ కార్యక్రమాలు మొదలుపెట్టాలని భావిస్తోందట చిత్ర బృందం. ప్రస్తుతం సినిమా చిత్రీకరణ చివరి దశలో ఉంది. పుణెలో ‘రామ్ లీలా’ షూటింగ్ జరుపుకున్న భవనంలోనే ‘జై లవకుశ’ చిత్రీకరణ జరుపుతున్నారు. ఆడియో వేడుక సమయానికే టాకీ పార్ట్ పూర్తి కావచ్చని సమాచారం. తర్వాత బ్యాలెన్స్ పాటలు చిత్రీకరించనున్నారు. సెప్టెంబరు 21న ‘జై లవకుశ’ విడుదలవుతుందని ఇంతకుముందే ప్రకటించిన సంగతి తెలిసిందే.