బాహుబలికి పోటీగా భర్త బలి

అసలే వరుస ఫ్లాపులతో స్లంపులో ఉన్నాడు అల్లరి నరేష్. ఈసారి హిట్టు కొట్టకుంటే చాలా కష్టం అనుకుంటూనే నాలుగైదు సినిమాలు చరిత్రలో కలిసిపోయాయి. ‘జేమ్స్ బాండ్’ కూడా తేడా కొట్టేస్తే అతడి కెరీర్ మరింత ప్రమాదంలో పడిపోతుంది. ఇంత డెస్పరేట్ సిచువేషన్లో బాహుబలికి పోటీగా తన సినిమా తెస్తుండటం విశేషమే. వేరే సినిమాలకైతే డైరెక్టుగా ఢీకొడితేనే పోటీ పడ్డట్లు.. కానీ బాహుబలి లాంటి సినిమా విషయంలో రెండు వారాల తర్వాత వచ్చినా పోటీ అన్నట్లే. ఎందుకంటే రెండో వారం కూడా బాహుబలి స్ట్రాంగ్ గా రన్ అవుతోంది. ఇప్పటికీ రెండు తెలుగు రాష్ట్రాల్లో 80 శాతం థియేటర్లలో బాహుబలే నడుస్తోంది.

బాహుబలితో పోటీని స్పోర్టివ్ గా తీసుకుంటూ జోకులు పేలుస్తోంది ‘జేమ్స్ బాండ్’ టీమ్. బాహుబలిలో విజువల్ ఎఫెక్టులుంటే మా సినిమాలో పెళ్లి చేసుకోవడం వల్ల వచ్చే సైడ్ ఎఫెక్టులు చూపించాం.. అది బాహుబలి అయితే ఇది భర్తబలి అని అంటున్నాడు అల్లరోడు. తన సినిమాల్లో పేరడీలు చేయడం అల్లరోడికి అలవాటే. సినిమాను కూడా అదే రీతిలో ప్రమోట్ చేస్తున్నాడు అల్లరి నరేష్. సాయికిషోర్ అనే కొత్త దర్శకుడు రూపొందించిన ‘జేమ్స్ బాండ్’కు రామబ్రహ్మం సుంకర నిర్మాత. సాక్షి చౌదరి హీరోయిన్ గా నటించింది. జేమ్స్ బాండ్ తరహా పెళ్లాంతో ఓ అమాయకుడు ఎలా వేగాడన్న కథాంశంతో తెరకెక్కిన ఈ సినిమాలో ‘కితకితలు’ ఛాయలు కనిపిస్తున్నాయి. కితకితలు లాగే ఈ సినిమా కూడా విజయవంతమై అల్లరోడి కెరీర్ని మళ్లీ సక్సెస్ ట్రాక్ ఎక్కిస్తుందేమో చూద్దాం.