అఫీషియల్: బ్లాక్ బస్టర్ ఆడియో ఆ రోజే

ఆగస్టు 12న అనుకున్న రిలీజ్ డేట్ సెప్టెంబరు 2కు మారిపోయింది. జులై 24న అనుకున్న ఆడియో వేడుకను వాయిదా వేసి ఆగస్టు 12కు ఫిక్స్ చేశారు. ‘జనతా గ్యారేజ్’ ఆడియో డేటు విషయంలో క్లారిటీ వచ్చేసింది. ఆగస్టు 12నా.. 13నా అనే విషయంలో కొన్ని రోజులుగా నడుస్తున్న సస్పెన్సుకి తెరదించుతూ ఆగస్టు 12న.. ఇంతకుముందు ‘జనతా గ్యారేజ్’ను విడుదల చేయాలనుకున్న తేదీకి ఆడియో వేడుక నిర్వహించాలని నిర్ణయించారు. నిర్మాణ సంస్థ మైత్రీ మూవీ మేకర్స్ అఫీషియల్ గానే ఈ విషయాన్ని వెల్లడించింది. సెప్టెంబరు 2న సినిమా రావడం కూడా కన్ఫమ్ అని స్పష్టం చేసింది.

ఇక ‘జనతా గ్యారేజ్’ ఆడియో మీద అంచనాలు మామూలుగా లేవు. దేవిశ్రీ ప్రసాద్-కొరటాల శివ కాంబినేషన్లో ఇంతకుముందు వచ్చిన ‘మిర్చి’.. ‘శ్రీమంతుడు’ ఆడియోలు ఎంత పెద్ద సక్సెస్ అయ్యాయో కొత్తగా చెప్పాల్సిన పని లేదు. అలాగే దేవి-ఎన్టీఆర్ కాంబినేషన్లోనూ మంచి మంచి ఆడియోలు వచ్చాయి. ఈ ముగ్గురూ కలిసి చేస్తున్న సినిమాకు మరింత గొప్ప ఆడియోను అభిమానులు ఆశిస్తున్నారు. ‘జనతా గ్యారేజ్’ యూనిట్ వర్గాల సమాచారం ప్రకారం ఆడియో ఓ రేంజిలో వచ్చిందని.. పాటలు ఇన్ స్టంట్ గా జనాలకు నచ్చేస్తాయని అంటున్నారు. సినిమా విడుదల వాయిదా పడటంతో దేవి పాటలు.. రీరికార్డింగ్ విషయంలో మరింత క్వాలిటీ చూపించడానికి అవకాశం కూడా దక్కింది. మరి ఔట్ పుట్ ఎలా ఉంటుందో చూద్దాం.