ఇండియన్ సినిమాల్లో గ్యారేజ్‌ కే తొలిసారట

డాల్బీ అట్మాస్.. కొన్నేళ్లుగా ఇండియన్ సినిమాలో చర్చనీయాంశమవుతున్న సౌండ్ టెక్నాలజీ. థియేటర్లో సౌండ్ విషయంలో ఇదో రెవల్యూషన్. థియేటర్లో అన్ని వైపుల నుంచి మరింత స్పష్టతతో శబ్దాల్ని ఆస్వాదించే వీలు కల్పించే టెక్నాలజీ ఇది. పెద్ద సినిమాలన్నింటికీ ప్రస్తుతం తప్పనిసరిగా ఆ సౌండ్ టెక్నాలజీని యాడ్ చేస్తున్నారు. ఐతే ఈ టెక్నాలజీతో ఇండియన్ సినిమాల్ని ఆస్వాదించే అవకాశం విదేశీ ప్రేక్షకులకు ఉండట్లేదు. ఆ టెక్నాలజీ యాడ్ చేసేటప్పటికి ఆలస్యమవుతోంది. అప్పటికి సినిమాలు వెళ్లిపోతున్నాయి. అమెరికాలో రిలీజైన ఏ ఇండియన్ సినిమానూ ఇప్పటిదాకా నేరుగా రిలీజ్ టైంలోనే డాల్బీ అట్మాస్ లో అందించలేదట. ఈ విషయంలో ‘జనతా గ్యారేజ్’దే రికార్డు అంటున్నారు.

అమెరికాలో నేరుగా డాల్బీ అట్మాస్ సౌండ్ టెక్నాలజీతో రిలీజవుతున్న తొలి ఇండియన్ సినిమా ఇదేనట. ‘జనతా గ్యారేజ్’ను అమెరికాలో రిలీజ్ చేస్తున్న ‘ఫికస్’ ఈ విషయాన్ని వెల్లడించింది. ముందుగా కొన్ని లొకేషన్లలో డాల్బీ అట్మాస్ తో రిలీజ్ చేసి.. ఆ తర్వాత మరిన్ని లొకేషన్లకు ఈ టెక్నాలజీని యాడ్ చేయబోతున్నారు. అమెరికాలో ‘జనతా గ్యారేజ్’ స్క్రీన్ కౌంట్ ఇంకా తేలలేదు. కనీసం 200 స్క్రీన్లలో సినిమాను రిలీజ్ చేస్తారని భావిస్తున్నారు. అమెరికా కాకుండా మిగతా దేశాల్లో ‘ఆస్ తెలుగు’ ఈ సినిమాను రిలీజ్ చేస్తోంది. అమెరికా కాకుండానే 187 స్క్రీన్లలో స్క్రీన్లలో సినిమా విడుదలవుతోంది. ఇండియాలో మినహాయించి 400 స్క్రీన్లలో ఈ సినిమా రిలీజవుతుందని అంచనా వేస్తున్నారు.