శ్రీ‌దేవి మైన‌పు బొమ్మ లాంచ్ అతిధి జాన్వీ

అతిలోక సుంద‌రి శ్రీ‌దేవి అనుమానాస్ప‌ద మ‌ర‌ణం అభిమానుల్ని క‌ల‌చి వేసిన సంగ‌తి తెలిసిందే. ఆ త‌ర్వాత క‌పూర్ ఫ్యామిలీలో ర‌క‌ర‌కాల స‌న్నివేశాలు అభిమానుల్లో చ‌ర్చ‌కు వ‌చ్చాయి. మామ్ శ్రీ‌దేవి మ‌ర‌ణాన్ని జాన్వీక‌పూర్- ఖుషీ క‌పూర్ చాలాకాలం మ‌ర్చిపోలేక‌పోయారు. భార్య మ‌ర‌ణంపై ప‌లుమార్లు బోనీక‌పూర్ మీడియా ముఖంగా త‌న వ్య‌థ‌ను వ్య‌క్తం చేశారు. శ్రీ‌దేవి జీవితంపై బ‌యోపిక్ ని నిర్మిస్తాన‌ని బోనీక‌పూర్ అప్ప‌ట్లో అన్నారు.

అదంతా అటుంచితే .. సింగ‌పూర్ మ్యాడ‌మ్ తుస్సాడ్స్ మ్యూజియంలో ఈ బుధ‌వారం శ్రీ‌దేవి మైన‌పు విగ్ర‌హాన్ని ఆవిష్క‌రించ‌నున్నారు. ఇంత‌కుముందు మామ్ జ‌యంతి సంద‌ర్భంగా తుస్సాడ్స్ నిర్వాహ‌కులు ఈ విష‌యాన్ని ప్ర‌క‌టించిన సంగ‌తి తెలిసిందే. ఇప్ప‌టికే బోనీక‌పూర్ - ఖుషీ క‌పూర్ సింగ‌పూర్ చేరుకున్నారు. నేటి ఉద‌యం శ్రీ‌దేవి న‌ట‌వార‌సురాలు.. పెద్ద కుమార్తె జాన్వీ కూడా సింగ‌పూర్ వెళ్లారు. ఇక మ్యూజియంలో శ్రీ‌దేవి మైన‌పు విగ్ర‌హావిష్క‌ర‌ణ‌ను తుస్సాడ్స్ వాళ్లు సోష‌ల్ మీడియాలో లైవ్ స్ట్రీమింగ్ చేయ‌నున్నారు. ఈ ఈవెంట్ కోసం ప్ర‌పంచ‌వ్యాప్తంగా శ్రీ‌దేవి అభిమానులు అంతే ఆస‌క్తిగా వేచి చూస్తున్నారు.

సింగ‌పూర్ వెళుతూ.. ముంబై విమానాశ్ర‌యంలో జాన్వీ క‌పూర్ చిరున‌వ్వులు చిందిస్తూ ఫోటోల‌కు ఫోజులిచ్చింది. ఆ ఫోటోలు ప్ర‌స్తుతం వైర‌ల్ గా మారాయి. నాచురంగు టాప్ .. చినుగుల జీన్స్.. క‌ళ్ల‌కు బ్లాక్ గాగుల్స్ తో జాన్వీ స్పెష‌ల్ అప్పియ‌రెన్స్ యువ‌త‌రాన్ని మైమ‌రిపించింది. ధ‌డ‌క్ త‌ర్వాత జాన్వీ న‌టించిన `గుంజ‌న్ స‌క్సేనా` బ‌యోపిక్ ప్ర‌స్తుతం ఇండ‌స్ట్రీలో హాట్ టాపిక్. ఈ సినిమాతో పాటు క‌ర‌ణ్ జోహార్ నిర్మిస్తున్న త‌క్త్ లోనూ కీల‌క పాత్ర పోషిస్తోంది. ప‌లు భారీ చిత్రాల‌కు జాన్వీ సంత‌కాలు చేసింది. సౌత్ లో.. టాలీవుడ్ లో జాన్వీ ఎంట్రీ గురించి ఆస‌క్తిక‌ర చ‌ర్చ సాగుతోంది.