మహేష్ - ఎన్టీఆర్ - చరణ్.. అమ్మడి సౌత్ డెబ్యూ ఎవరితో ఉంటుందో..?

దివంగత 'అతిలోకసుందరి' శ్రీదేవి కుమార్తె, బాలీవుడ్ బ్యూటీ జాన్వీ కపూర్ టాలీవుడ్ ఎంట్రీ గురించి ఎప్పటి నుంచో వార్తలు వస్తున్నాయి. అమ్మడిని తెలుగు ఇండస్ట్రీకి తీసుకురాడానికి మన నిర్మాతలు చాలా కాలంగా ట్రై చేస్తున్నారు. అయితే ఇంతవరకూ కుదరలేదు. ఈ క్రమంలో ఇప్పుడు మూడో క్రేజీ ప్రాజెక్ట్స్ లలో ఏదొక సినిమాతో జాన్వీ టాలీవుడ్ లాంఛింగ్ ఉంటుందని టాక్ నడుస్తోంది.

సూపర్ స్టార్ మహేష్ బాబు - డైరెక్టర్ త్రివిక్రమ్ శ్రీనివాస్ కాంబినేషన్ లో హ్యాట్రిక్ మూవీ 'SSMB28' తెరకెక్కనున్న సంగతి తెలిసిందే. హారిక అండ్ హాసిని క్రియేషన్స్ బ్యానర్ లో రాధాకృష్ణ నిర్మించే ఈ కమర్షియల్ ఎంటర్టైన్ లో జాన్వీ ని హీరోయిన్ గా తీసుకోవాలని చూస్తున్నారట. ఇప్పటికే త్రివిక్రమ్ దీని గురించి ఆమెతో డిస్కషన్ కూడా చేశారని అంటున్నారు.

అలానే యంగ్ టైగర్ ఎన్టీఆర్ - ప్రశాంత్ నీల్ కాంబోలో రూపొందే '#NTR31' సినిమాతో జాన్వీ టాలీవుడ్ ఎంట్రీ ఉంటుందని వార్తలు వస్తున్నాయి. మైత్రీ మూవీ మేకర్స్ నిర్మాతలు ఇప్పటికే ఆ దిశగా ప్రయత్నాలు మొదలు పెట్టారట. ఈ మేరకు జాన్వీ తండ్రి బోనీ కపూర్ ను సంప్రదించినట్టు టాక్ వినిపిస్తోంది.

మరోవైపు రామ్ చరణ్ - శంకర్ కలయికలో రాబోతున్న పాన్ ఇండియా ప్రాజెక్ట్ '#RC15' లో జాన్వీ కపూర్ హీరోయిన్ గా నటించే అవకాశాలు లేకపోలేదని ఫిలిం సర్కిల్స్ లో అనుకుంటున్నారు. నిజానికి 'జగదేకవీరుడు అతిలోకసుందరి' సీక్వెల్ చేస్తే చరణ్ కు జోడీగా జాన్వీని తీసుకొస్తానని నిర్మాత అశ్వినీ దత్ ఎప్పటి నుంచో చెబుతున్నారు.

ఇలా అతిలోకసుందరి కూతురి సౌత్ డెబ్యూ గురించి పలు వార్తలు వస్తున్నాయి. మహేష్ - తారక్ - చరణ్ ముగ్గురిలో ఎవరితో కలసి జాన్వీ కపూర్ టాలీవుడ్ లో అడుగుపెడుతుందో చూడాలి. కాగా, 'ధడక్‌' సినిమాతో తెరంగ్రేటం చేసిన జాన్వీ.. 'గుంజన్ సక్సేనా: ది కార్గిల్ గర్ల్' చిత్రంలో ప్రశంసలు అందుకుంది. ఇటీవల నటించిన 'రూహి' ఆశించిన స్థాయిలో విజయం సాధించకపోవడంతో.. ఇప్పుడు 'దోస్తానా 2' సినిమాపైనే ఆశలు పెట్టుకుంది.