ఓటీటీలో జాతిరత్నాలు.. ఎప్ప‌ట్నుంచి అంటే..?

అండర్ డాగ్ గా బరిలోకి దిగి.. వరల్డ్ కప్ కొట్టిన జట్టులా తయారైంది ‘జాతిరత్నాలు’ సినిమా! ఈ చిత్రం సాధించిన విజ‌యం చూసి.. ఇండ‌స్ట్రీ మొత్తం నోరెళ్ల‌బెట్టిందంటే అతిశ‌యోక్తి కాదు. ఇప్ప‌టి వ‌ర‌కు ఈ సినిమా దాదాపు 65 కోట్ల మేర వ‌సూళ్లు సాధించిందని అంచ‌నా.

న‌వీన్ పొలిశెట్టి, రాహుల్ రామ‌కృష్ణ‌, ప్రియ‌ద‌ర్శి కాంబినేష‌న్ ప్రేక్ష‌కులు ఏ స్థాయిలో ఎంజాయ్ చేస్తున్నారో.. సినిమా క‌లెక్ష‌న్లే చాటిచెబుతున్నాయి. క‌రోనా త‌ర్వాత వ‌చ్చి, ఇండ‌స్ట్రీలో ఎన్నో రికార్డుల‌ను బ‌ద్ధ‌లు కొట్టిన ‘ఉప్పెన’ సినిమాను కూడా క్రాస్ చేసిందీ మూవీ. ఓవ‌ర్సీస్ లో ఉప్పెన క‌న్నా అధికంగా క‌లెక్ష‌న్లు కొల్ల‌గొట్టి ఔరా అనిపించింది.

దర్శకుడు కావాలనే లాజిక్కులు వదిలిపెట్టగా.. జనాలకు కూడా అదే నచ్చింది. కేవలం.. నవ్వడం అనే విషయాన్ని మాత్రమే ఫోకస్ చేసిన ఆడియన్స్.. మరే పాయింట్ ను కూడా పట్టించుకోలేదు. కీర్తిసురేష్, విజయ్ దేవరకొండ గెస్ట్ అప్పియరెన్స్ కూడా ఆకట్టుకుంది. దర్శకుడి కామెడీ యాంగిల్ ను ఓన్ చేసుకున్న ప్రేక్షకులు.. అద్దిరిపోయే బ్లాక్ బస్టర్ ను అందించారు.

ఇప్పుడు లేటెస్ట్ అప్డేట్ ఏమంటే.. జాతిరత్నాలు ఇకనుంచి కంప్రెస్డ్ వెర్షన్ లో అలరించబోతోంది. అదేనండీ.. ఓటీటీలో. ముందుగా చేసుకున్న ఒప్పందం ప్ర‌కారం.. సినిమా విడుద‌లైన నెల రోజుల‌కు ఓటీటీలో విడుద‌ల కాబోతోంది. ఏప్రిల్ 11 నుంచి ప్ర‌ముఖ ఓటీటీ సంస్థ అమెజాన్ ప్రైమ్ లో ఈ మూవీ స్ట్రీమింగ్ కానుంది. మ‌రి, ఇక్క‌డ ఎలాంటి రికార్డు న‌మోదు చేస్తుందో చూడాలి.