మహేష్ బాబుతో 'జాతిరత్నం' సినిమా..!

సూపర్ స్టార్ మహేష్ బాబు హీరోగా సినిమాలు చేస్తూనే మరోవైపు నిర్మాతగానూ పూర్తిగా బిజీ అవుతున్నాడు. ప్రస్తుతం మహేష్ హీరోగా ‘సర్కారు వారి పాట’ అనే సినిమా తెరకెక్కుతుంది. అయితే తన సినిమాలకు నిర్మాణంలో భాగస్వామ్యం అవ్వడంతో పాటు వేరే హీరోల సినిమాలను తన జిఎంబి బ్యానర్లో రూపొందిస్తున్నాడు. ఇప్పటికే మహేష్ బాబు నిర్మాణసంస్థలో వరుసగా పలు సినిమాలు సన్నద్ధం అవుతున్నాయి. ప్రస్తుతానికి అడవి శేష్ హీరోగా మేజర్ సినిమా తెరకెక్కింది. ఆ సినిమా షూటింగ్ ముగించుకుని పోస్ట్ ప్రొడక్షన్ కార్యక్రమాలు జరుపుకుంటోంది. జులైలో మేజర్ రిలీజ్ కాబోతుంది. ఇదిలా ఉండగా.. మేజర్ తర్వాత మహేష్ యంగ్ హీరో నవీన్ పోలిశెట్టితో ఓ సినిమాను చేస్తున్నట్లు తెలుస్తుంది.

ఇటీవలే నవీన్.. జాతిరత్నాలు సినిమాతో సూపర్ హిట్ అందుకున్నాడు. ఆ సినిమా ఇంటర్వ్యూ సమయంలో కూడా మహేష్ బాబు ప్రొడక్షన్ లో ఓ సినిమా చేస్తున్నట్లు చెప్పుకొచ్చాడు. అయితే తను నిర్మించనున్న సినిమాలకు మహేష్ కథల ఎంపిక కూడా చేస్తున్నాడట. మహేష్ నిర్మాణంలో నవీన్ హీరోగా రూపొందే సినిమాతో వీరశేఖర్ అనే నూతన దర్శకుడు పరిచయం అవుతున్నట్లు సమాచారం. ప్రస్తుతం ఆ సినిమా ప్రీ-ప్రొడక్షన్ పనులు ముగించుకొని షూటింగ్ కు సిద్ధంగా ఉందని సినీవర్గాలలో టాక్. ఏజెంట్ సాయి సినిమాతో విమర్శకుల ప్రశంసలు అందుకున్న నవీన్.. ప్రస్తుతం ‘జాతి రత్నాలు’ సక్సెస్ ఎంజాయ్ చేస్తున్నాడు. ఆ వెంటనే మహేష్ సినిమాలో పాల్గొంటాడని వినికిడి. త్వరలోనే వీరి సినిమాకు సంబంధించిన అధికారిక ప్రకటన రానుందట.