'రాధేశ్యామ్' నుంచి పిలుపందుకున్న జాతిరత్నం!

ప్రభాస్ అభిమానులంతా ఇప్పుడు 'రాధేశ్యామ్' సినిమా కోసం ఎంతో ఆసక్తితో .. ఆత్రుతతో ఎదురుచూస్తున్నారు. యూవీ క్రియేషన్స్ .. టి - సిరీస్ .. గోపీకృష్ణ మూవీస్ వారు ఈ సినిమాను భారీ బడ్జెట్ తో నిర్మించారు. రాధాకృష్ణ కుమార్ ఈ సినిమాకి దర్శకుడిగా వ్యవహరించాడు. కరోనా సృషించిన అవాంతరాల వలన .. కథకి అవసరమైన గ్రాఫిక్స్ వలన ఈ సినిమా మూడేళ్ల సమయాన్ని తీసుకుంది. ప్రభాస్ సరసన నాయికగా ఈ సినిమాలో పూజ హెగ్డే కనువిందు చేయనుంది. ఈ సినిమా నుంచి అప్ డేట్స్ కూడా చాలా ఆలస్యంగా వచ్చాయి.

ప్రభాస్ అభిమానులు ఎంతో కాలంగా ఎదురుచూస్తున్న ఈ సినిమా, జనవరి 14వ తేదీన వివిధ భాషల్లో విడుదలవుతోంది. ఈ నేపథ్యంలో ఈ నెల 23వ తేదీన హైదరాబాద్ రామోజీ ఫిల్మ్ సిటీలో ఈ సినిమాకి సంబంధించిన నేషనల్ ఈవెంట్ ను వైభవంగా నిర్వహించనున్నారు. ప్రస్తుతం అందుకు సంబంధించిన సన్నాహాలు జరుగుతున్నాయి. ఈ ఈవెంట్ కి ఏజెంట్ సాయిశ్రీనివాస ఆత్రేయ ఫేమ్ నవీన్ హోస్టుగా వ్యవహరించనున్నట్టు తెలుస్తోంది. తెరపైనే కాదు .. బయట కూడా నవీన్ బాగా నవ్విస్తుంటాడు. తన సహజమైన పంచులతో ఆకట్టుకుంటూ ఉంటాడు. ఆయనలోని ఆ సమయ స్ఫూర్తి కారణంగానే ఈ ఛాన్స్ ఇచ్చినట్టుగా తెలుస్తోంది.

ఇటీవల వచ్చిన 'జాతిరత్నాలు' సినిమాతో నవీన్ కి మరింత మంచి పేరు వచ్చింది. ఆ క్రేజ్ ను కాపాడుకునే దిశగానే ఆయన అడుగులు వేస్తున్నాడు. అందువల్లనే తొందరపడకుండా తనకి నచ్చిన కథలకు మాత్రమే గ్రీన్ సిగ్నల్ ఇస్తున్నాడు. యూవీ క్రియేషన్స్ వారితో నవీన్ కి మంచి అనుబంధం ఉంది. అందువల్లనే వారు అడగ్గానే కాదనకుండా వెంటనే అంగీకరించినట్టుగా తెలుస్తోంది. ఇక నవీన్ తో పాటు రష్మీ గౌతమ్ కూడా స్టేజ్ పై సందడి చేయనుందని అంటున్నారు. 'రాధేశ్యామ్' పాన్ ఇండియా మూవీ .. ఆ స్థాయికి తగినట్టుగానే ఈవెంట్ ను ప్లాన్ చేశారట.

ఇక ఇది విదేశీ నేపథ్యంలో సాగే ప్రేమకథ. ప్రతి పాటతో ప్రేక్షకులను మరో లోకంలోకి తీసుకుని వెళ్లే విధంగా ఒక దృశ్యకావ్యంగా ఈ సినిమాను మలిచారు. అందుకోసం భారీమొత్తంలో ఖర్చు చేశారు. ఇంతవరకూ ఈ సినిమా నుంచి వచ్చిన అప్ డేట్స్ వలన ఆ విషయం స్పష్టంగా అర్థమైపోతోంది. జస్టిన్ ప్రభాకరన్ అందించిన సంగీతం ఈ సినిమాను మరో స్థాయికి తీసుకుని వెళుతుందని అంటున్నారు. కృష్ణంరాజు .. భాగ్యశ్రీ .. సచిన్ ఖేడ్కర్ కీలకమైన పాత్రలను చేశారు.
'సాహో' తరువాత ప్రభాస్ నుంచి వస్తున్న ఈ సినిమా కొత్త రికార్డులకు తెర తీస్తుందేమో చూడాలి.