కొడుకునే 'షీ టీమ్' కి ప‌ట్టించిన జ‌య‌సుధ‌!

అమ్మాయిల్ని ఈవ్ టీజింగ్ చేయ‌డం.. ఏడిపించ‌డం నేరం. ప‌బ్లిక్ లో వెళుతూ ఉన్న అమ్మాయిల వెంట ప‌డి వెకిలి వేషాలు వేస్తే ఇంత‌కుముందులా కుద‌ర‌దు. హైద‌రాబాద్ స‌హా ప‌లు న‌గ‌రాల్లో షీ టీమ్ లు వెంటాడి వేటాడుతున్నాయి. పోకిరీల్ని మ‌క్కెలు ఇర‌గ‌ద‌న్ని జైల్లో వేస్తున్నారు. ఈ ప‌రిణామంతో ఇటీవ‌ల కొంత‌వ‌ర‌కూ పోకిరీ వేషాలు క‌ట్ట‌డ‌య్యాయి.

అయితే షీటీమ్ లు ప‌ని చేస్తున్నాయా లేదా? అన్న‌ది ప్ర‌జ‌ల‌కు తెలిసేదెలా? అందుకే స‌హ‌జ‌న‌టి జ‌య‌సుధ చే ప్ర‌చార కార్య‌క్ర‌మం చేప‌ట్టారు హైద‌రాబాద్ పోలీస్. జ‌య‌సుధ‌తో ఓ వీడియోని చేయించి వ‌దిలింది షీ టీమ్ వింగ్. ఈ వీడియోలో క‌న్న కొడుకు అయినా వ‌ద‌ల‌ని జ‌య‌సుధ యాక్ట్ కి చ‌ప్ప‌ట్లు ప‌డుతున్నాయి. కాస్త లెంగ్తీ డైలాగ్ తోనే షీటీమ్ ల ఘ‌న‌త‌ను వివ‌రించి చెప్పారు స‌ద‌రు సీనియ‌ర్ న‌టి.

అమ్మ అనే ప‌దం ఎక్క‌డ నుంచి వ‌చ్చిందో తెలుసారా? నువ్వు ఏడిపిస్తున్నావే ఇలాంటి అమ్మాయిల నుంచి.. వాళ్లేరా నీలాంటి య‌ద‌వ‌ల్ని క‌న్న నాలాంటి త‌ల్లులు..! అంటూ భారీ పంచ్ డైలాగునే చెప్పారు జ‌య‌సుధ‌. కొడుకే వెకిలి వేషాలు వేసినా షీటీమ్ వ‌ద‌ల‌దు అంటూ నా ప‌ర అనే భేధం లేకుండా త‌న కుమారుడికి వార్నింగ్ ఇస్తున్న ఈ వీడియోకి జేజేలు ప‌ల‌కాల్సిందే. ``మీకోస‌మే గ‌వ‌ర్న‌మెంట్ కొత్త‌గా షీ టీమ్ ని ప్ర‌వేశ పెట్టింది. ఎలాంటివాడైనా షీటీమ్ కి ప‌ట్టుబ‌డితే శిక్ష త‌ప్ప‌దు. ఇలాంటి లోఫ‌ర్స్ ని ప‌ట్టుకునేందుకే మేం ఇలా మ‌ఫ్టీలో తిరుగుతున్నాం`` అంటూ ప్ర‌చారం వేడెక్కించారు. ``పెట్టీ కేసే క‌దా అని అనుకుంటున్నావా? ఇదంతా లైవ్ లో చూపిస్తాం. నిర్భ‌య యాక్ట్ ఎంత ప‌వ‌ర్ ఫుల్ నో తెలుసు కదా? అంద‌రికీ తెలిసిపోయింది క‌దా! అని బ‌రితెగించావ‌నుకో .. అప్పుడుంటుంది. నిర్భ‌య‌ యాక్ట్ తో క్రిమిన‌ల్ కేసు బుక్ చేస్తాం. జీవితం నాశ‌నం అయిపోతుంది`` అంటూ షీటీమ్ సంగ‌తి మొత్తం ఈ వీడియోలో వివ‌రించి చెప్పారు. మొత్తానికి జ‌య‌సుధ లాంటి ప్ర‌భావ‌వంత‌మైన న‌టితో ప్ర‌చారం చేయించాల‌న్న ఆలోచ‌న బాగానే వ‌ర్క‌వుట‌వుతోంది. ప్ర‌స్తుతం ఈ వీడియో సోష‌ల్ మీడియాల్లోనూ వైర‌ల్ అవుతోంది.