హీరోయిన్ గా మారుతున్న మరో యాంకర్

బుల్లితెర నుంచి వచ్చి వెండితెరకు వచ్చిన స్వాతి.. హీరోయిన్ గా వెలుగుతూనే ఉంది. ఇప్పుడు అనసూయ, రష్మీలు కూడా టీవీలో పేరు తెచ్చుకుని హీరోయిన్ లు అయిపోయారు. ఇప్పుడు మరో బుల్లితెర భామ తన అదృష్టాన్ని పరీక్షించుకునేందుకు వచ్చేస్తోంది. టీవీ యాంకర్ జయతి.. ఇప్పుడు హీరోయిన్ అయిపోతోంది. ఇప్పుడు హారర్ కామెడీ జోనర్ కి మాంచి డిమాండ్ ఉండడంతో.. అదే సెగ్మెంట్ లో ఎంటర్ అవుతోంది ఈ భామ.

అయితే.. అందరి లాగా జస్ట్ ఓ ట్రయల్ అని అనుకోవడం లేదు జయతి. రావడం రావడమే చాలా సీరియస్ గా ఎంట్రీ ఇస్తోంది. ఎంత సీరియస్ అంటే.. తను హీరోయిన్ గా అరంగేట్రం చేయనున్న సినిమాని.. తనే నిర్మిస్తోంది జయతి. ఇందుకోసం జే94 షోస్ అనే సొంత బ్యానర్ స్టార్ట్ చేసేసింది. జెమినీ టీవీలో బాగా పాపులర్ అయిన వెన్నెల ప్రోగ్రాం ద్వారా జయతికి గుర్తింపు లభించింది. అంతేకాదు... కేవలం జయతి కాస్ట్యూమ్స్ చూసేందుకు.. ఆమెకు అభిమానులున్నారంటే ఆశ్చర్యం వేయక మానదు. ఆరేళ్లుగా ఈ షో చేస్తున్న జయతి.. ఇప్పటివరకూ ఒక్క సారి కూడా వేసిన కాస్ట్యూమ్ వేయలేదు.

ఈమె కేవలం యాంకర్, యాక్టర్ మాత్రమే కాదు.. ప్రొఫెషనల్ గా కాస్ట్యూమ్ డిజైనర్ కూడా. తను హీరోయిన్ గా అరంగేట్రం చేయనున్న సినిమాకి సంబంధించిన హీరో, డైరెక్టర్ సహా ఇతర వివరాలను త్వరలో వెల్లడించేందుకు స్వయంగా రెడీ అవుతోంది జయతి.