వీడు వేరే హీరోల ప్లేట్లు లాగేలా ఉన్నాడు

గత ఏడాది ప్రేక్షకుల ముందుకు వచ్చిన 'ఆర్‌ఎక్స్‌ 100' చిత్రంతో హీరోగా మంచి గుర్తింపు దక్కించుకున్న కార్తికేయ ప్రస్తుతం 'హిప్పీ' అనే చిత్రాన్ని చేస్తున్న విషయం తెల్సిందే. టీఎన్‌ కృష్ణ దర్శకత్వంలో రూపొందుతున్న ఈ చిత్రంలో ముఖ్య పాత్రను జేడీ చక్రవర్తి పోషిస్తున్నాడు. షూటింగ్‌ షెడ్యూల్‌ ను వివరించేందుకు, సినిమా అప్‌ డేట్స్‌ ను ఇచ్చేందుకు యూనిట్‌ సభ్యులు మీడియా సమావేశం ఏర్పాటు చేశాడు. ఆ మీడియా సమావేశంలో నటుడు జేడీ చక్రవర్తి ఆసక్తికర వ్యాఖ్యలు చేశాడు.

'హిప్పీ' సినిమా షూటింగ్‌ లో పాల్గొనేందుకు మొదటి రోజు వెళ్లిన సమయంలో కార్తికేయపై ఫైట్‌ చిత్రీకరణ జరుపుతున్నారు. కార్తికేయని మొదటి సారి చూడగానే అమ్మ ఇరగదీస్తున్నాడుగా అనుకున్నాను. వీడి జోరు చూస్తుంటే ఇతర హీరోల ప్లేట్లు(ఛాన్స్‌లు) లాగేసుకునేలా ఉన్నాడుగా అనుకున్నాను. విభిన్నమైన మ్యానరిజంతో, నటనతో కార్తికేయ నటిస్తున్నాడు. తప్పకుండా కార్తికేయకు మంచి భవిష్యత్తు ఉందని జేడీ అన్నాడు. ఇక ఈ చిత్రంలో హీరోయిన్‌ గా నటించిన దిగాంగన సూర్యవంశీపై కూడా జేడీ ప్రశంసలు కురిపించాడు. అందంగా హీరోయిన్స్‌ ఎక్కువ మంది బుర్రను కలిగి ఉండరు. చాలా తెలివి తక్కువగా ఉంటారు. కాని దిగాంగన మాత్రం చాలా విభిన్నంగా ఉంది. అందంతో పాటు చాలా తెవివైన, చురుకైన అమ్మాయి. తన పాత్రను మాత్రమే అర్థం చేసుకోకుండా సీన్‌ మొత్తం అర్థం చేసుకుని, తన అవసరం ఏంటీ అనే విషయాన్ని తెలుసుకుని ఆ తర్వాత నటిస్తుంది. ఆమె డెడికేషన్‌ కు ఫిదా అయ్యానంటూ జేడీ హీరోయిన్‌ పై ప్రశంసలు కురిపించాడు.