ఆ డైరెక్ట‌ర్ ఆ హీరోని వ‌ద‌ల‌డా?

క్రైమ్ థ్రిల్ల‌ర్ క‌థాంశంతో తెర‌కెక్కిన మ‌ల‌యాళ మూవీ 'దృశ్యం'. మ‌ల‌యాళ సూప‌ర్ స్టార్ మోహ‌న్ లాల్న‌, మీనా జంట‌గా న‌టించిన ఈ మూవీ 2013లో విడుద‌లై సంచ‌ల‌న విజ‌యాన్ని సొంతం చేసుకుంది. గ్రిప్పింగ్ థ్రిల్ల‌ర్ గా ఆక‌ట్టుకుంది. దీనికి సీక్వెల్ గా దాదాపు ఏడేళ్ళ త‌రువాత 2021లో ఇదే టీమ్ తో సీక్వెల్ గా 'దృశ్యం 2'ని తెర‌కెక్కించారు జీతూ జోసెఫ్‌. ఈ మూవీని క‌రోనా కార‌ణంగా డైరెక్ట్ ఓటీటీలో విడుద‌ల చేశారు. ఆంటోనీ పెరంబ‌వూర్ నిర్మించిన సీక్వెల్ లోనూ మోహ‌న్ లాల్‌, మీనా జంట‌గా న‌టించి ఆక‌ట్టుకున్నారు.

తొలి భాగాన్ని మించిన ఫ్యామిలీ డ్రామా, స‌స్పెన్స్ థ్రిల్ల‌ర్ గా సీక్వెల్ సంచ‌ల‌న విజ‌యాన్ని సొంతం చేసుకుంది. ఇదే మూవీని తెలుగులో విక్ట‌రీ వెంక‌టేష్, మీనాల‌తో రీమేక్ చేశారు. ఇది కూడా బ్లాక్ బ‌స్ట‌ర్ హిట్ అనిపించుకుంది. క‌న్న‌డ‌లో 'చంద్ర‌ముఖి' ఫేమ్ పి. వాసు డైరెక్ట్ చేయ‌గా ర‌విచంద్ర‌న్‌, న‌వ్యానాయ‌ర్ జంట‌గా న‌టించారు. గ‌త ఏడాది డిసెంబ‌ర్ లో విడుద‌లైన ఈ మూవీ అక్క‌డ కూడా భారీ విజ‌యాన్ని సొంతం చేసుకుంది.

హిందీలో అజ‌య్ దేవ‌గ‌న్‌, శ్రియా, ట‌బు కీల‌క పాత్ర‌ల్లో రీమేక్ చేశారు. అభిషేక్ పాథ‌క్ ద‌ర్శ‌కత్వం వ‌హిస్తున్న ఈ మూవీ షూటింగ్ పూర్తి చేసుకుని పోస్ట్ ప్రొడ‌క్ష‌న్ కార్య‌క్ర‌మాలు జ‌రుపుకుంటోంది. టి సిరీస్ ఫిలింస్ బ్యాన‌ర్ పై భూష‌న్ కుమార్ నిర్మిస్తున్న ఈ మూవీని డిసెంబ‌ర్ 18న విడుద‌ల చేయ‌బోతున్నారు.

ఇది కూడా బ్లాక్ బ‌స్ట‌ర్ హిట్ గా నిలిస్తే 'దృశ్యం 2' స‌రికొత్త రికార్డుని సృష్టించిన‌ట్టే అని చెబుతున్నారు. సీక్వెల్స్ సాధారణంగా హిట్ అయిన దాఖ‌లాలు చాలా త‌క్కువ అయితే దృశ్యం, దృశ్యం 2 మాత్రం ప్ర‌తీ భాష‌లోనూ బ్లాక్ బ‌స్ట‌ర్ హిట్ లుగా నిల‌వ‌డం విశేషం.

ఇదిలా వుంటే 'దృశ్యం 2'లో పార్ట్ 3 కి లీడ్ వ‌దిలిన విష‌యం తెలిసిందే. ఈ నేప‌థ్యంలో ద‌ర్శ‌కుడు జీతూ జోసెఫ్ 'దృశ్యం 3'ని ప్రారంభించ‌బోతున్నార‌ట‌. మోహ‌న్ లాల్, మీనా, ఆశా శ‌ర‌త్ ప్ర‌ధాన పాత్ర‌ల్లో ప్రారంభించ‌బోతున్నాడు. ఈ విష‌యాన్ని నిర్మాత ఆంటోని పెరంబ‌వూర్ తాజాగా వెల్ల‌డించి సీక్వెల్ పై క్లారిటీ ఇచ్చారు. తాజాగా జ‌రిగిన ఓ సినిమా ఈవెంట్ లో పాల్గొన్న నిర్మాత ఆంటోని పెరంబ‌వూర్ త్వ‌ర‌లో 'దృశ్యం 3' వుంటుంద‌ని వెల్ల‌డించ‌డం విశేషం.

ఇదిలా వుంటే 'దృశ్యం 2' త‌రువాత జీతూ జోసెఫ్, మోహ‌న్ లాల్ ల క‌ల‌యిక‌లో ఇటీవ‌ల '12th Man' అనే మూవీ వ‌చ్చింది. 'దృశ్యం' సిరీస్ మూవీస్ బ్లాక్ బ‌స్ట‌ర్ హిట్ కావ‌డంతో ఈ మూవీ కూడా అదే రేంజ్ వుంటుంద‌ని అంతా భావించారు కానీ ఆ స్థాయిలో సినిమా ఆక‌ట్టుకోలేక‌పోయింది. ఫ్లాప్ గా నిలిచింది. ఈ నేప‌థ్యంలో మ‌రోసారి 'దృశ్యం 3' కోసం ఈ ఇద్ద‌రు క‌లిసి వ‌ర్క్ చేయ‌బోతుండ‌టంతో ఈ ద‌ర్శ‌కుడు మోహ‌న్ లాల్ ని వ‌ద‌ల‌డా? అంటూ కామెంట్ లు వినిపిస్తున్నాయి.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.