`నంది`వివాదం...జీవిత షాకింగ్ కామెంట్స్‌!

నంది అవార్డుల‌పై టాలీవుడ్ లో చ‌ర్చోప‌చ‌ర్చ‌లు జ‌రుగుతున్న సంగతి తెలిసిందే. ఈ వివాదం పై ఇండ‌స్ట్రీ రెండు గా చీలిపోయింది. అవార్డుల ఎంపిక‌పై, జ్యూరీ స‌భ్యుల‌పై మెజారిటీ స‌భ్యులు విమ‌ర్శ‌లు గుప్పిస్తున్నారు. కొంద‌రు మాత్రం అవార్డుల ఎంపిక‌పై అసంతృప్తులు స‌హ‌జ‌మంటున్నారు. నంది అవార్డులు ప్రభుత్వమే ఇచ్చినా, జ్యూరీ స‌భ్యులు సినిమా రంగానికి చెందిన ప్రైవేట్ వ్యక్తులే అని హీరో శివాజీ కామెంట్ చేశాడు. అదే స‌మ‌యంలో, అవార్డులు రాని వారు త‌మ బాధను చెప్పుకోవ‌డంలో త‌ప్పు లేద‌ని సేఫ్ గేమ్ ప్లే చేశాడు. అదే త‌ర‌హాలో సినీ న‌టి జీవిత ఈ వివాదంపై త‌న‌దైన శైలిలో స్పందించారు. జ్యూరీ ప్రాసెస్ గురించి తెలియ‌ని వారు అవార్డుల ఎంపిక‌ను విమ‌ర్శించ‌డం త‌గ‌ద‌న్నారు.

ఇండ‌స్ట్రీకి చెందిన అంశాల‌లో జీవితా రాజశేఖర్ చురుగ్గా స్పందిస్తారు. టాలీవుడ్ ను కుదిపేసిన డ్ర‌గ్స్ వ్య‌వ‌హారం పై కూడా జీవిత ఘాటుగా స్పందించారు. తాజాగా, నంది అవార్డులపై ఆమె స్పంద‌న ఆస‌క్తిక‌రంగా ఉంది. నంది అవార్డుల జాబితాను 3 నెలల పాటు క‌ష్ట‌ప‌డి, ఎన్నో అంశాల‌ను ప‌రిగ‌ణ‌లోకి తీసుకుని సిద్ధం చేస్తార‌ని జీవిత చెప్పారు. జ్యూరీ సభ్యుల శ్రమని గుర్తించ‌కుండా, ఇండ‌స్ట్రీ ప‌రువు తీస్తున్నారంటూ ఆవేదన చెందారు.

జ్యూరీ ప్రాసెస్ గురించి తెలియ‌ని వారు అవార్డుల గురించి మాట్లాడకూడ‌ద‌న్నారు. నంది అవార్డుల ఎంపికపై మెగా ఫ్యామిలీ నుంచి ఎవ‌రూ స్పందించలేదని, వారికి లేని బాధ బయటి వారికి ఎందుక‌ని జీవిత షాకింగ్ కామెంట్స్ చేశారు. బాల‌య్య‌ -నాగ్ ల మ‌ధ్య విభేదాల కార‌ణంగానే మ‌నం సినిమాకు అవార్డు రాలేద‌ని, అవార్డుల ఎంపికలో మెగా ఫ్యామిలీకి అన్యాయం జ‌రిగింద‌ని ప‌లు విమ‌ర్శ‌లు వ‌స్తున్న నేప‌థ్యంలో జీవిత వ్యాఖ్య‌లు ఆస‌క్తిక‌రంగా మారాయి. త్వ‌ర‌లోనే జీవిత సైకిల్ ఎక్క‌బోతున్న‌ట్లు వార్తలు వ‌స్తున్న సంగ‌తి తెలిసిందే. ఈ నేప‌థ్యంలో ప్ర‌భుత్వానికి, జ్యూరీకి మ‌ద్ద‌తుగా జీవిత మాట్లాడ‌డంలో ఆశ్చ‌ర్య‌ప‌డాల్సిందేమీ లేద‌ని ప‌లువురు రాజ‌కీయ‌, సినీ విశ్లేష‌కులు అభిప్రాయ‌ప‌డుతున్నారు.