'జల్సా' స్పెషల్ షోలపై 'లార్గో వించ్' డైరెక్టర్ సెటైరికల్ ట్వీట్..!

పవన్ కళ్యాణ్ కెరీర్‌ లో భారీ డిజాస్టర్స్ లో ''అజ్ఞాతవాసి'' సినిమా ప్రత్యేకంగా నిలిచిపోయింది. అభిమానులకు ఇది ఎప్పటికీ మరిచిపోలేని చేదు జ్ఞాపకంగా మిగిలిపోయింది. త్రివిక్రమ్ శ్రీనివాస్ దర్శకత్వంలో పవర్ స్టార్ సిల్వర్ జూబ్లీ మూవీగా తెరకెక్కిన ఈ చిత్రం.. తీవ్ర నిరాశను మిగిల్చింది. నిర్మాతలకు 50 కోట్లకు పైగా నష్టాలను తెచ్చిపెట్టింది. అంతేకాదు ఇది త్రివిక్రమ్ ను కాపీ దర్శకుడు అని ట్రోల్స్ చేసేలా చేసింది.

'లార్గో వించ్' అనే ఫ్రెంచ్ మూవీని లిఫ్ట్ చేసి త్రివిక్రమ్ 'అజ్ఞాతవాసి' చిత్రాన్ని తీసాడని అప్పట్లో సోషల్ మీడియాలో ట్రోలింగ్ జరిగింది. ఒరిజినల్ దర్శకుడు జెరోమ్ సల్లే సైతం ఇది తన సినిమాకు అనుకరణ అంటూ ట్వీట్ చేసి మేకర్స్ కు పెద్ద తలనొప్పి సృష్టించిన సంగతి తెలిసిందే.

'అజ్ఞాతవాసి' కాపీ వివాదం ముదరడంతో చివరి నిమిషంలో మేకర్స్ జెరోమ్ తో సర్దుకోవాల్సి వచ్చింది. అందుకే పవన్ సినిమా ప్లాప్ అయిందనే దానికంటే.. అది ఫ్రీమేక్ అనేదే ఫ్యాన్స్‌ ను ఎక్కువగా బాధించింది. పవన్ కళ్యాణ్ మళ్లీ సినిమాల్లోకి రీఎంట్రీ ఇవ్వడంతో ఇప్పుడిప్పుడే 'అజ్ఞాతవాసి' గాయాన్ని మర్చిపోతున్నారు.

అయితే ఇన్నేళ్లకు 'లార్గో వించ్' దర్శకుడు జెరోమ్ సల్లే మళ్లీ పవన్ కళ్యాణ్ ఫ్యాన్స్ సర్కిల్స్ లో చర్చనీయాంశంగా మారాడు. ఈసారి 'జల్సా' స్పెషల్ షోలను ఎగతాళి చేసి వార్తల్లో నిలిచాడు ఫ్రెంచ్ ఫిలిం మేకర్.

పవన్ కళ్యాణ్ పుట్టినరోజు సందర్భంగా సెప్టెంబర్ 2వ తేదీన ప్రపంచ వ్యాప్తంగా 'జల్సా' 4K వెర్షన్ ను ప్రత్యేకంగా ప్రదర్శించాలని పీకే అభిమానులు ప్లాన్ చేశారు. ఇందులో భాగంగా ఫ్రాన్స్‌ లోని ప్యారిస్‌ లో కూడా స్పెషల్ షోలను వేయడానికి సన్నాహాలు చేశారు.

ఈ విషయాన్ని పవన్ కళ్యాణ్ ఫ్యాన్ పేజ్ లో ట్వీట్ చేశారు. ఆసక్తికరంగా దీనిపై జెరోమ్ సల్లే స్పందించాడు. 'జల్సా' స్పెసిల్ షోలను ఉద్దేశిస్తూ "కూల్! నేను గిఫ్ట్ తీసుకురావాలా? ఉదాహరణకి స్క్రిప్ట్ లాగా" అని ట్వీట్ చేశాడు.

'అజ్ఞాతవాసి' సినిమా కోసం తన కథని కాపీ చేశారని జెరోమ్ ఇప్పుడు పవన్ కళ్యాణ్ నటించిన 'జల్సా' చిత్రాన్ని వెక్కిరిస్తున్నాడని స్పష్టంగా అర్థమవుతుంది. తనకు ఈ సినిమాతో ఏ విధంగానూ సంబంధం లేదు కానీ.. త్రివిక్రమ్ - పవన్ కలిసి చేసిన మూవీ కావడంతో ఆయన ఈ సందర్భాన్ని ఉపయోగించుకున్నాడు.

అతను దీనికి #PowerStarBirthday అనే హ్యాష్‌ ట్యాగ్‌ ని జోడించడమే కాదు.. పవన్ కళ్యాణ్‌ ను కూడా ట్యాగ్ చేశాడు. జెరోమ్ చేసిన ట్వీట్ ఇప్పుడు సోషల్ మీడియాలో వైరల్ అవుతోంది. దీనిపై పీకే ఫ్యాన్స్ ఫన్నీగా రియాక్ట్ అవుతున్నారు. నువ్వు ఇచ్చిన స్క్రిప్ట్ తోనే మర్చిపోలేని సినిమా వచ్చింది.. ఇంకా నువ్వు ఎలాంటి బహుమతులు ఇవ్వొద్దు అంటూ కామెంట్స్ పెడుతున్నారు.



నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.