జాన్వీ లైన్ లోకి వచ్చేసింది

తల్లి మరణించిన శోకాన్ని దిగమింగుకుని మొన్నే తన పుట్టిన రోజు వేడుకలు చేసుకున్న జాన్వీ కపూర్ ఎట్టకేలకు తన రొటీన్ లోకి వచ్చేసింది. డెబ్యు మూవీ ధడక్ షూటింగ్ మళ్ళి స్టార్ట్ అయ్యింది. ముంబై బాంద్రా కార్టర్ రోడ్ లోని ఒక ఇంట్లో హీరో ఇషాన్ కట్టర్ తో పాటు సన్నివేశాలు చిత్రీకరిస్తున్నారు. శశాంక్ ఖైతాన్ దర్శకత్వం వహిస్తున్న ఈ మూవీ ఇప్పటికే ముప్పాతిక షూటింగ్ పూర్తి చేసుకుంది. ముందు ప్లాన్ చేసుకున్న ప్రకారం పూర్తి చేయగలిగితే జూన్ లో ధడక్ విడుదల అవుతుంది. కరణ్ జోహార్ నిర్మాతగా వ్యవహరిస్తున్న ఈ మూవీ పై శ్రీదేవి మరణం తర్వాత అంచనాలు పెరిగిపోయాయి. బిడ్డ మొదటి సినిమా చూడకుండానే కన్ను మూసిన శ్రీదేవి కూతురిని వెండితెరపై చూడాలని అభిమానులు ఎదురు చూస్తున్నారు.

ధడక్ జాన్వీ నటనకు పరీక్ష పెట్టేదే. ఇది రెగ్యులర్ మాస్ మసాలా కమర్షియల్ సినిమా కాదు. అలా అని ఐదు పాటలు, టీజింగ్ సన్నివేశాలు ఉండే లవ్ స్టొరీ కాదు. ఎమోషన్ ని బేస్ చేసుకున్న రాజు పేద ఫార్ములాలో తీసిన డిఫరెంట్ స్టొరీ. ప్రేమిస్తే లాంటి సినిమాలు చూసిన మన ప్రేక్షకులకు ఇదేమి మరీ కొత్త కాన్సెప్ట్ కాదు కాని ట్రీట్మెంట్ లోని ఫ్రెష్ నెస్ మరాటి సినిమా ప్రేమికులను విపరీతంగా ఆకట్టుకుని నాలుగు కోట్ల బడ్జెట్ కు ఎనభై కోట్ల రిటర్న్స్ ఇచ్చింది. అందుకే దీన్ని జాన్వీ డెబ్యు మూవీగా ఎంచుకున్నారు.

తెలుగు తమిళ బాషలలో కూడా రీమేక్ చేసేందుకు నిర్మాత రాక్ లైన్ వెంకటేష్ హక్కులు కొన్నారని వార్తలు వచ్చాయి కాని అది ఆచరణకు వచ్చే అవకాశాలు మాత్రం కనిపించడం లేదు. ఒకవేళ ధడక్ నే డబ్ చేసి ఇక్కడ కూడా విడుదల చేస్తారేమో చూడాలి. జాన్వీ కపూర్ ఇది విడుదల అయ్యాకే కొత్త సినిమాల గురించి అలోచిస్తుందట. తనను టాలీవుడ్ కు తీసుకువచ్చే ప్రయత్నం కపూర్ కుటుంబంతో మంచి అనుబంధం ఉన్న ఓ అగ్ర నిర్మాత గట్టిగానే చేస్తున్నట్టు టాక్.