నెక్స్ట్ ఏంటి జాన్వీ?

చాలా ఎగ్జైటింగ్ గా ఫాన్స్ ఎదురు చూసిన స్వర్గీయ అందాల తార శ్రీదేవి కూతురు జాన్వీ కపూర్ తెరంగేట్రం అంచనాలకు భిన్నంగా జరగడం అభిమానులను నిరాశ పరుస్తోంది. మరాఠి అల్ టైం బ్లాక్ బస్టర్ గా పేరు తెచ్చుకోవడంతో పాటు ఎవర్ గ్రీన్ క్లాసిక్ లవ్ స్టోరీ గా నిలిచిన సైరాత్ రీమేక్ ను తన లాంచింగ్ కు ఎన్నుకోవడం చూసి అందరు సరైన నిర్ణయమే అనుకున్నారు . కానీ వారి ఆశలను నీరుగారుస్తూ దర్శకుడు శశాంక్ ఖైతాన్ తీర్చిదిద్దిన తీరు విమర్శకుల చేత ఫుట్ బాల్ ఆడించేసింది. మొదటి సినిమా కాబట్టి జాన్వీని శ్రీదేవితో పోల్చడం న్యాయం కాదు కానీ స్క్రీన్ మీద మరీ మేజిక్ చేసేంత అందం ఇంకా జాన్వీలో మొగ్గ తొడగలేదని కామెంట్స్ అయితే వచ్చాయి. మొదటిరోజు ఓపెనింగ్స్ పరంగా డెబ్యూ మూవీస్ లో రికార్డు సృష్టించిందని నిర్మాత కరణ్ జోహార్ ప్రమోట్ చేస్తున్నప్పటికీ రోజు రోజుకి డ్రాప్ అయితే పెరుగుతోంది. 90 కోట్ల దాకా బిజినెస్ జరిగిన ఈ సినిమా కనీసం 100 కోట్లు దాటితే కానీ సేఫ్ అనిపించుకోదు. టాక్ ని బట్టి చూస్తే ఇది అంత సులభం కాదు.

ఇది సూపర్ హిట్ అయితే జాన్వీకి అవకాశాలు వెల్లువలా వచ్చి పడతాయని అంచనా వేసిన కపూర్ ఫ్యామిలీ లెక్కలు తప్పాయి. ఇప్పుడు రెండో సినిమా విషయంలో మరింత జాగ్రత్తలు తీసుకునే అవకాశం ఉంది. తెలుగులో లాంచ్ చేసేందుకు ఇద్దరు అగ్ర నిర్మాతలు గతంలోనే బోనీ కపూర్ ని సంప్రదించారని గతంలోనే వార్తలు వచ్చాయి. దఢక్ రిలీజ్ అయ్యాక ఇప్పుడు వేచి చూసే ధోరణి అవలంబించాలని నిర్ణయించుకున్నట్టు తెలిసింది. జగదేకవీరుడు అతిలోకసుందరి సీక్వెల్ తీస్తే కనక అందులో జాన్వీనే దేవకన్య పాత్రలో చూపించాలని అశ్వనీదత్ అనుకున్నారట. కానీ దానికి తగ్గ కథ లేకపోవడంతో అది పక్కకు వెళ్లిపోయింది. హిందీలో మరో సాలిడ్ హిట్ తో ప్రూవ్ చేసుకునే వరకు జాన్వీ కపూర్ ని సౌత్ కు పరిచయం చేసే ప్రయత్నం బోనీ కపూర్ చేయకపోవచ్చు. దఢక్ రిజల్ట్ చూసాక దాన్ని గతంలో తెలుగు తమిళ్ లో రీమేక్ చేద్దామని హక్కులు కొన్న ఓ అగ్ర నిర్మాత ఆ డబ్బులు పోతే పోయాయి నిర్మాణం మాత్రం చేయకూడదని డిసైడ్ అయినట్టు ఫిలిం నగర్ టాక్.