తమిళ నిర్మాతకు మూడు సినిమాలు రాసిచ్చేశాడు

సాయికుమార్ వారసత్వంతో తెలుగు సినిమాల్లోకి అరంగేట్రం చేసిన యువ కథానాయకుడు ఆది కెరీర్ ఏమంత గొప్పగా లేదు. అతను హీరోగా పరిచయమై ఆరేడేళ్లవుతున్నా ఇంకా నిలదొక్కుకోలేదు. రకరకాల కథలు ట్రై చేసి విఫలమయ్యాడు. ఈ ఏడాది తొలిసారి ‘శమంతకమణి’ లాంటి మల్టీస్టారర్లో నటిస్తే.. అది కూడా నిరాశనే మిగిల్చింది. ఇప్పుడతడి ఆశలన్నీ ‘నెక్స్ట్ నువ్వే’ మీదే ఉన్నాయి. అల్లు అరవింద్, బన్నీ వాసు, జ్నానవేల్ రాజా, వంశీ-ప్రమోద్ (యువి క్రియేషన్స్) లాంటి పెద్ద నిర్మాతలు కలిసి పెట్టిన ‘వీ4 క్రియేషన్స్’ బేనర్లో ఆది ఈ సినిమా చేయడం విశేషం. ఇంతమంది నమ్మి చేసిన సినిమా కాబట్టి తనకు మంచి ఫలితమే వస్తుందని ఆశిస్తున్నాడు ఆది.

విశేషం ఏంటంటే.. ‘వీ4 క్రియేషన్స్’ బేనర్లో భాగస్వామి అయిన తమిళ నిర్మాత జ్నానవేల్ రాజాకు ఆది మూడు సినిమాలు కమిటయ్యాడట. అందులో ఒకటి ఇప్పటికే సెట్స్ మీద కూడా ఉందట. విశ్వనాథ్ అనే కొత్త దర్శకుడితో ఆ సినిమా చేస్తున్నట్లు ఆది వెల్లడించాడు. మిగతా రెండు సినిమాలు రెండు భాషల్లో తెరకెక్కే అవకాశముందని చెప్పాడు. జ్నానవేల్ రాజా లాంటి పెద్ద నిర్మాత.. ఇంకా హీరోగా నిలదొక్కుకోని ఆదితో మూడు సినిమాలకు కమిట్మెంట్ తీసుకోవడం విశేషమే. అంతగా అతడిలో రాజాకు ఏం నచ్చేసిందో ఏమో. ఐతే ఇలాంటి కమిట్మెంట్లు కొత్త సినిమాల ఫలితాల్ని బట్టి ఉంటాయి. కాబట్టి ముందు ‘నెక్స్ట్ నువ్వే’ ఎలాంటి ఫలితాన్నందుకుంటుందో చూద్దాం.