బన్నీ.. నీ ఫైట్ కాపీ కొట్టేశారమ్మా

టాలీవుడ్ లో గత కొన్నేళ్లలో ట్రెండ్ సెట్ చేసిన ఫైట్లు ఏవంటే ముందు ‘ఇద్దరమ్మాయిలతో’ సినిమాలోని ఇంటర్వెల్ యాక్షన్ ఎపిసోడ్ గుర్తుకొస్తుంది. మలేషియా యాక్షన్ డైరెక్టర్ కిచా రూపొందించిన ఈ ఫైట్ అప్పట్లో పెద్ద సెన్సేషన్ అయింది. సినిమా ఫ్లాప్ అయినా ఆ ఎపిసోడ్ మాత్రం జనాల్ని బాగా ఆకట్టుకుంది. ముఖ్యంగా అందులో అల్లు అర్జున్ కత్తిని పిన్నులాగా వాడుతూ పొడిచే సన్నివేశం హైలైట్ అయింది. ఇప్పుడు ఆ సీన్ ను బాలీవుడ్ వాళ్లు కాపీ కొట్టేశారు. జాన్ అబ్రహాం హీరోగా తెరకెక్కుతున్న ‘రాకీ హ్యాండ్సమ్’ సినిమాలో సేమ్ ఇలాంటి సీన్ దించేశారు. నిన్న రిలీజైన టీజర్లో జాన్ అబ్రహాం బన్నీ స్టయిల్లోనే కత్తితో విలన్ని చీరేస్తూ కనిపించాడు.

ఈ మధ్య చాలా సెలెక్టివ్ గా సినిమాలు చేస్తున్న జాన్.. తన సొంత బేనర్లో ‘రాకీ హ్యాండ్సమ్’ సినిమా చేస్తున్నాడు. నిషికాంత్ కామత్ రూపొందిస్తున్న ఈ సినిమా.. టీజర్ తో బాగానే ఆకట్టుకుంది. తనకు అత్యంత ఇష్టమైన పాపను డ్రగ్ మాఫియా చంపేస్తే వారిపై పగ తీర్చుకునే హీరో కథతో ఈ సినిమా తెరకెక్కింది. జాన్ ఇందులో మెస్మరైజింగ్ లుక్ లో కనిపిస్తున్నాడు. జాన్ ఇంతకుముందు తన బేనర్లో విక్కీ డోనర్, మద్రాస్ కేఫ్ లాంటి మంచి సినిమాల్ని అందించిన నేపథ్యంలో ‘రాకీ హ్యాండ్సమ్’ మీద కూడా అంచనాలు భారీగా ఉన్నాయి. ఇందులో జాన్ సరసన శ్రుతి హాసన్ హీరోయిన్ గా నటిస్తుండటం విశేషం. ఐతే టీజర్లో ఎక్కడా ఆమెను చూపించలేదు. మార్చి 25న ఈ సినిమా ప్రేక్షకుల ముందుకు రానుంది.