వరుసగా పాన్ ఇండియా మూవీలను ప్లాన్ చేస్తున్న ఎన్టీఆర్...!

యంగ్ టైగర్ ఎన్టీఆర్.. ప్రస్తుతం టాలీవుడ్ స్టార్ హీరోల్లో ఒకరు. నందమూరి వారసుడిగా ఇండస్ట్రీలో అడుగుపెట్టి తక్కువ కాలంలోనే తనకంటూ ప్రత్యేక గుర్తింపు తెచ్చుకున్నాడు. యాక్టింగ్, డ్యాన్స్ లలో తనకు పోటీ వచ్చే వారే లేరని నిరూపించుకున్నాడు. ఎన్టీఆర్ ప్రస్తుతం దర్శకధీరుడు రాజమౌళి తెరకెక్కిస్తున్న బిగ్గెస్ట్ మల్టీస్టారర్ ఆర్.ఆర్.ఆర్ లో నటిస్తున్నాడు. ఈ సినిమాలో మరో స్టార్ హీరో రామ్ చరణ్ తో స్క్రీన్ షేర్ చేసుకుంటున్నాడు. ఆర్.ఆర్.ఆర్ లో తెలంగాణ స్వాతంత్ర్య సమరయోధుడు 'కొమరం భీమ్' పాత్రలో తారక్ కనిపించనున్నాడు. ఇప్పుడు దేశవ్యాప్తంగా సినీ అభిమానులు ఆర్.ఆర్.ఆర్ రిలీజ్ కోసం ఎంతో ఎదురుచూస్తున్నారు. ఆ సినిమా రిలీజ్ తర్వాత తారక్ క్రేజ్ మరింత పెరిగే అవకాశం ఉంది. పాన్ ఇండియా మూవీగా భారీ బడ్జెట్ తో తెరకెక్కుతున్న ఈ సినిమా ఇతర భారతీయ భాషల్లో కూడా భారీగా రిలీజ్ అవుతున్న సంగతి తెలిసిందే.

ప్రస్తుతం సౌత్ ఇండస్ట్రీలో ఉన్న చాలా మంది అగ్ర దర్శకులు జూనియర్ ఎన్టీఆర్ తో ఒక్క సినిమా అయినా చేయాలని ట్రై చేస్తున్నారు. ఇప్పటికే కేజీయఫ్' దర్శకుడు ప్రశాంత్ నీల్ ఎన్టీఆర్ కి ఒక స్టోరీ కూడా చెప్పాడని సమాచారం. అలాగే తమిళ్ లో వరుస విజయాలతో దూసుకుపోతున్న డైరెక్టర్ అట్లీ కూడా తారక్ తో సంప్రదింపులు జరిపాడు. ఎన్టీఆర్ - అట్లీల మధ్య రాజమౌళి తండ్రి విజయేంద్ర ప్రసాద్ మధ్యవర్తిగా వ్యవహరించాడని తెలుస్తోంది. గతంలో 'అదిరింది' సినిమాకి అట్లీ విజయేంద్ర ప్రసాద్ కలిసి పని చేసారు. అట్లీ దగ్గర మంచి కథ ఉందని తెలుసుకున్న విజయేంద్ర ప్రసాద్ ఆ స్టోరీకి జూనియర్ ఎన్టీఆర్ కరెక్ట్ గా సరిపోతాడని సలహా ఇవ్వడంతో ఈ కాంబినేషన్ సెట్టవ్వడానికి దారితీసినట్లు తెలుస్తోంది.

అయితే ఎన్టీఆర్ ప్రస్తుతం తన కెరీర్లో 30వ చిత్రంతో బిజీగా ఉన్నాడు. మరో వైపు అట్లీ బాలీవుడ్ హీరో షారుఖ్ ఖాన్ తో సినిమా చేయాలని ట్రై చేస్తున్న విషయం తెలిసిందే. ఈ సినిమాలు పూర్తయిన తర్వాత తారక్ 31వ సినిమాను అట్లీతోనే చేసే అవకాశాలున్నాయి. ఒకవేళ ఇదే నిజమైతే ఎన్టీఆర్ - అట్లీ కాంబినేషన్ లో బిగ్గెస్ట్ పాన్ ఇండియా సినిమా రాబోతోంది అనడంలో ఎలాంటి సందేహం లేదు. ఇదిలా ఉండగా ఎన్టీఆర్ - త్రివిక్రమ్ సినిమాకు 'అయిననూ పోయిరావలె హస్తినకు' అనే టైటిల్ పరిశీలిస్తున్నారట. ఈ సినిమాని హారిక అండ్ హాసిని ఎంటర్టైన్మెంట్స్ మరియు ఎన్టీఆర్ ఆర్ట్స్ కలిసి సంయుక్తంగా నిర్మిస్తున్నారు.