వైరల్ వీడియో: జక్కన్నతో ఎన్టీఆర్ - మహేష్ ప్రొడ్యూసర్..!

టాలీవుడ్ లో దర్శకధీరుడు ఎస్.ఎస్ రాజమౌళి మరియు యంగ్ టైగర్ ఎన్టీఆర్ ల అనుబంధం గురించి ప్రత్యేకంగా చెప్పనవసరం లేదు. దాదాపు ఒకే సమయంలో తమ కెరీర్‌ ను ప్రారంభించిన వీరిద్దరూ.. హీరో - దర్శకుడుకి మధ్య ఉండే సంబంధానికి మించిన స్నేహబంధాన్ని పంచుకుంటున్నారు.

తారక్ నటించిన 'స్టూడెంట్ నెంబర్ 1' సినిమాతో రాజమౌళి డైరెక్టర్ గా ఇండస్ట్రీకి పరిచయం అయ్యారు. అప్పుడు మొదలైన దర్శక హీరోల సినీ ప్రయాణం.. ఇప్పుడు 'ఆర్.ఆర్.ఆర్' వరకు కొనసాగుతూ ఎందరికో స్ఫూర్తిదాయకంగా నిలిచింది.

ఇప్పటి వరకు వీరి కాంబినేషనల్ లో వచ్చిన నాలుగు సినిమాలూ బాక్సాఫీస్ వద్ద భారీ విజయాలను నమోదు చేసాయి. 'స్టూడెంట్ నెంబర్-1' 'సింహాద్రి' 'యమదొంగ' వంటి హ్యాట్రిక్ హిట్స్ తర్వాత వచ్చిన నాలుగో సినిమా RRR.. బిగ్గెస్ట్ బ్లాక్ బస్టర్ గా నిలిచింది.

కొమురం భీమ్ గా ఎన్టీఆర్.. అల్లూరి సీతారామరాజుగా రామ్ చరణ్ కలిసి నటించిన 'ఆర్.ఆర్.ఆర్' చిత్రం ప్రపంచ వ్యాప్తంగా 1200 కోట్ల వరకూ వసూళ్లు రాబట్టి.. అత్యధిక కలెక్షన్స్ సాధించిన భారతీయ చిత్రాల జాబితాలో చేరింది.

ట్రిపుల్ ఆర్ చిత్రానికి అంతర్జాతీయ ప్రశంసలు దక్కిన తర్వాత ఇప్పుడు ఆస్కార్ అవార్డ్స్ కోసం ప్రయత్నాలు మొదలు పెట్టారు. మొత్తం 15 విభాగాల్లో అకాడెమీ నామినేషన్స్ కోసం టీమ్ క్యాంపెయిన్ స్టార్ట్ చేసింది. ఇందులో ఉత్తమ నటుడు - ఉత్తమ దర్శకుడు క్యాటగిరీలలో ఎన్టీఆర్ - రాజమౌళి కూడా ఉన్నారు.

అయితే లేటెస్టుగా తారక్ మరియు జక్కన్న ఓ ప్రైవేట్ ఫంక్షన్ లో సందడి చేసిన ఓ వీడియో ఇప్పుడు సోషల్ మీడియాలో వైరల్ అవుతోంది. బ్లాక్ అండ్ వైట్ డ్రెస్సులో ఉన్న దర్శక హీరోలు.. దేని గురించో సీరియస్ గా డిస్కస్ చేసుకుంటున్నట్లు మనకు ఈ వీడియోలో కనిపిస్తోంది.

నిర్మాత కెఎల్ నారాయణ మరియు రాజమౌళి కుమారుడు కార్తికేయ కూడా వీరిద్దరితో కలిసి ఆహ్లాదకరంగా మాట్లాడుతున్నట్లు ఈ వీడియో క్లిప్‌ లో చూడొచ్చు. టాలీవుడ్ లో మోస్ట్ సక్సెస్ ఫుల్ కాంబినేషన్ గా పేర్కొనబడిన ఎన్టీఆర్ - రాజమౌళి.. మళ్ళీ జత కడితే చూడాలని అభిమానులు కోరుకుంటున్నారు.

RRR తర్వాత సూపర్ స్టార్ మహేష్ బాబుతో SSMB29 ప్రాజెక్ట్ కోసం రాజమౌళి సమాయత్తం అవుతున్నారు. ప్రస్తుతం ప్రీ ప్రొడక్షన్ దశలో ఉన్న ఈ చిత్రాన్ని వచ్చే ఏడాది సెట్స్ మీదకు తీసుకెళ్లనున్నారు. దుర్గా ఆర్ట్స్ బ్యానర్ లో కెఎల్ నారాయణ ప్రతిష్టాత్మకంగా ఈ సినిమాని నిర్మించనున్నారు.

మహేష్ తో గ్లోబ్‌ ట్రాటింగ్ యాక్షన్ అడ్వెంచర్‌ చిత్రాన్ని తెరకెక్కించనున్నట్లు బాహుబలి దర్శకుడు ఇప్పటికే క్లారిటీ ఇచ్చారు. ఇది కచ్చితంగా బిగ్గెస్ట్ ప్రాజెక్ట్ అవుతుందని పేర్కొన్నారు. ఈ క్రేజీ ప్రాజెక్ట్ తర్వాత ఎన్టీఆర్ - జక్కన్న కలయికలో సినిమా పడితే ఈసారి వరల్డ్ బాక్సాఫీస్ షేక్ అవుతుందని అభిమానులు కామెంట్స్ చేస్తున్నారు.

ట్రిపుల్ ఆర్ సినిమాతో ఎన్టీఆర్ కు గ్లోబల్ ఆడియన్స్ ప్రశంసలు దక్కాయి. ఆస్కార్ అవార్డ్ వచ్చినా రాకపోయినా దర్శక హీరోలకు అంతర్జాతీయంగా మంచి గుర్తింపు ఉంటుంది. ఒకవేళ వీరి మళ్ళీ సినిమా చేస్తే అది కచ్చితంగా క్రేజీ ప్రాజెక్ట్ అవుతుంది. మరి రాబోయే రోజుల్లో ఈ ఐకానిక్ కాంబో మరో ఉత్తేజకరమైన ప్రాజెక్ట్‌ కోసం జట్టు కడుతుందేమో చూడాలి.




నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.