మెగా హీరోలకే దడ పుట్టిస్తున్న పిల్లోడు

మెగా కుటుంబం హీరోల సినిమాలు వస్తున్నాయంటే మిగతా హీరోలంతా తమ సినిమాలను వాయిదా వేసుకుంటారు. వారి సినిమాల ముందు తమ సినిమాలు తేలిపోతాయని భయపడుతుంటారు. కానీ.. ఓ పిల్లోడు మాత్రం మెగా హీరోల సినిమా అయితే ఏంటంటూ వారి సినిమాలతో పోటీ పడుతున్నాడు. పవన్ కళ్యాణ్ "సర్దార్ గబ్బర్ సింగ్", అల్లు అర్జున్ "సరైనోడు" సినిమాలకు సరిగ్గా మధ్యలో అనగా.. ఏప్రిల్ 15న వస్తున్నాడు. ఆ బుడ్డోడి పేరు "మోగ్లీ".

90వ దశకంలో జన్మించిన పిల్లలందరికీ "మోగ్లీ" సుపరిచితుడే. చాలాకాలం తరువాత మళ్లీ మోగ్లీ ముఖ్యపాత్రలో వస్తున్నా "జంగిల్ బుక్" ఏప్రిల్ 15న ప్రపంచవ్యాప్తంగా విడుదలవుతోంది. పవర్ స్టార్ - స్టైలిష్ స్టార్ ల స్టార్ డమ్ కు మించిన పాపులారిటీ "జంగిల్ బుక్"కు ఉందన్న విషయం అందరికీ తెలిసిందే. తెలుగు - తమిళ - హిందీ వెర్షన్లలో విడుదలవుతున్న ఈ చిత్రం "సర్దార్ మరియు సరైనోడు" సినిమాల కలెక్షన్ల పై ప్రభావం చూపే అవకాశం లేకపోలేదంటున్నారు సినీ విశ్లేషకులు. సర్దార్ - సరైనోడు సినిమా టీంలు కూడా మోగ్లీ సినిమాపై చర్చించుకున్నాయట. అయితే... బడా స్టార్లు కావడంతో మోగ్లీ కోసం వారి సినిమాలు వాయిదా వేస్తే చిన్నతనంగా ఉంటుందన్న ఉద్దేశంతో అభిమానులను నమ్ముకుని రిలీజ్ కు రెడీ అవుతున్నారని టాక్.