భల్లాలతో బొమ్మరిల్లు ఫాదర్ రమ్మీ ఆట

లక్షలు.. కోట్ల కోసం దేన్నైనా ప్రమోట్ చేసేస్తున్నారు చాలామంది యాక్టర్లు. ఇప్పుడు ఏకంగా పేకాటకు కూడా ప్రచారాలు మొదలైపోయాయి. ప్రకాష్ రాజ్.. దగ్గుబాటి రానాలు.. పేకాట సులువుగా ఎలా ఆడాలో నేర్పించేస్తున్నారు.

మన దేశంలో పేకాట ఆడ్డం తప్పే కానీ.. అదే ఆన్ లైన్‌లో అయితే నిక్షేపంగా ఆడేసుకోవచ్చు. అందుకే నేషనల్ వైడ్ గా గుర్తింపు ఉన్న యాక్టర్లతో యాడ్ ఇచ్చేసింది జంగ్లీ రమ్మీ. ఇందులో మన బొమ్మరిల్లు ఫాదర్ ప్రకాష్ రాజ్ లీడ్ రోల్ చేయడం ఆశ్చర్యం కలిగించే విషయం. ఇక దగ్గుబాటి రానా కూడా జంగ్లీ రమ్మీ యాడ్ లో మెరిశాడు. ఇద్దరూ కలిసి ఇంట్లో పేకాట ఆడుకోవడంలో ఇబ్బందులను ప్రాక్టికల్ గా చూపించి మరీ.. ఆన్ లైన్ లో రమ్మీ ఆడుకోమని సలహా ఇస్తున్నారు. ఇలాంటి వ్యసనాలకు దూరంగా ఉండమని చెప్పాల్సిన పొజిషన్ లో ఉన్నవాళ్లు.. యాడ్స్ చేస్తే వచ్చే డబ్బుల కోసం.. ఇంటింటికే కాదు.. ఫోన్ ఫోన్ కీ రమ్మీ ఆడుకోమని చెప్పడం చాలా దారుణమైన విషయం.

పేకాట ఎంతమంది జీవితాలను నాశనం చేసిందో అంటూ చాలానే సినిమాలు కూడా వచ్చాయి. అలాంటిది ఇప్పుడు సినిమావాళ్లే కార్డ్స్ ఆడుకోమని చెబుతున్నారు. ఆన్ లైన్ లో రమ్మీ ఆడితే తప్పు లేదన్నట్లుగా తీసిన ఇలాంటి యాడ్ లో మన టాలీవుడ్ నటులు కనిపించడం.. బాధ పడాల్సిన విషయమే.