జ‌ర్న‌లిస్టుగా మారుతున్న జ్యోతిక!

హీరో సూర్య‌ను పెళ్లి చేసుకున్న త‌రువాత కొన్నాళ్లపాటు కుటుంబ జీవితానికే ప్రాధాన్య‌త ఇచ్చింది న‌టి జ్యోతిక‌. పిల్ల‌లు కాస్త పెద్ద‌వాళ్లు కావ‌డంతో సెకెండ్ ఇన్నింగ్స్ గ‌త ఏడాదే ప్రారంభించింది. అయితే, హీరోయిన్ పాత్ర‌లు కాకుండా, హీరోయిన్ ఓరియెంటెడ్ క‌థ‌ల్ని ఆమె ఎంపిక చేసుకుంటోంది. గ‌త ఏడాది ఆమె 36 వాయిదినిలె అనే చిత్రం ద్వారా రీ ఎంట్రీ ఇచ్చిన జ్యోతిక‌... తద్వారా మ‌రోసారి అభిమానుల‌ను అల‌రించారు. అయితే, ఇప్పుడు కూడా అలాంటి హీరోయిన్ ప్ర‌ధాన క‌థ‌నే ఎంచుకుంది జ్యోతిక. ద‌స‌రా పండుగ సంద‌ర్భాన్ని పుర‌స్క‌రించుకుని జ్యోతిక తాజా చిత్రం విశేషాల‌ను ట్విట్ట‌ర్ ద్వారా అభిమానుల‌తో పంచాడు హీరో సూర్య‌.

త‌న భార్య తాజాగా న‌టించ‌బోతున్న చిత్రం పేరు ‘మ‌గ‌లిర్ మ‌ట్టుమ్‌’ అనీ, ఆ చిత్రానికి సంబంధించిన ఫస్ట్ లుక్ పోస్ట‌ర్ ను ట్విట్ట‌ర్ ద్వారా విడుద‌ల చేశారు. ఈ చిత్రంలో జ్యోతిక ఒక జ‌ర్న‌లిస్టు పాత్ర పోషిస్తున్న‌ట్టు తెలుస్తోంది. ఒక కేసును ప‌రిశోధించే పాత్రికేయురాలి పాత్ర‌లో జ్యోతిక క‌నిపించ‌బోతోంద‌న్న‌మాట‌. హీరోయిన్ ప్ర‌ధానంగా సాగే ఈ చిత్రానికి తొలిసారిగా ద‌ర్శ‌క‌త్వం వ‌హిస్తున్నాడు బ్ర‌హ్మ‌. అత‌డు చెప్పిన క‌థ న‌చ్చ‌డంతో ఈ చిత్రాన్ని సూర్య త‌న సొంత బ్యాన‌ర్‌ పై నిర్మిస్తున్నాడు. 2 డి ఎంట‌ర్‌ టెయిన్మెంట్ ప‌తాకంపై ఈ ప్రాజెక్ట్ జులై నుంచే ప్రారంభం అయ్యింది.

సూర్య విడుదల చేసిన ఈ చిత్రం పోస్టర్ ఇప్పుడు సోషల్ మీడియాలో ట్రెండింగ్ అవుతోంది. మొత్తమ్మీద మరో మంచి పాత్రను జ్యోతిక ఎంచుకుందనే చెప్పాలి. ఈ చిత్రంలో జ్యోతికతో పాటు శరణ్య - ఊర్వశి - భానుప్రియ - నాజర్ తదితరులు నటిస్తున్నారు.

Like Us on Facebook : https://www.facebook.com/Tupakidotcom/