లేడీ పోలీస్‌ వా? అప‌ర‌కాళిక‌వా?

`36 వ‌య‌దినిలే` చిత్రంతో జ్యోతిక రీఎంట్రీలో బ్లాక్‌ బ‌స్ట‌ర్ విజ‌యం అందుకుంది. హ‌బ్బీ సూర్య స‌పోర్ట్‌ తో కెరీర్ ప‌రంగా బిజీ అయిపోయింది. ఓ వైపు కిడ్స్ బాధ్య‌త‌లు చూసుకుంటూనే మ‌రోవైపు ఆన్ లొకేష‌న్ మేక‌ప్ వేసుకుని డ్యూటీలో దిగిపోయింది. ఆ క్ర‌మంలోనే సూర్య 2డి ఎంట‌ర్‌ టైన్‌ మెంట్స్‌ లో వ‌రుస‌గా జ్యోతికతో సినిమాలు తీస్తున్నాడు. అదే కోవ‌లో తెర‌కెక్కి త‌మిళంలో ఘ‌న‌విజ‌యం సాధించిన `నాచియార్‌` .. ఝాన్సీ పేరుతో తెలుగు ప్రేక్ష‌కుల ముందుకు వ‌స్తోంది. కోనేరు కల్పన - డి అభిరాం అజయ్ కుమార్ కలిసి కల్పనా చిత్ర - యశ్వంత్ మూవీస్ బ్యానర్‌ లో ఈ చిత్రాన్ని ఆగష్టు 17న రిలీజ్ చేసేందుకు స‌న్నాహాలు చేస్తున్నారు.

శివపుత్రుడు - వాడు వీడు - నేను దేవుణ్ణి వంటి జాతీయ అవార్డులు తీసిన బాలా ఈ చిత్రానికి ద‌ర్శ‌క‌త్వం వ‌హిస్తుండ‌డంతో అంద‌రిలో ఆస‌క్తి నెల‌కొంది. జ్యోతిక పవర్ ఫుల్ పోలీస్ ఆఫీసర్‌ గా బాలా అద్భుత‌మైన స్క్రిప్టుతో నాచియార్ చిత్రాన్ని తెర‌కెక్కించారు. ఈ సినిమాకి ఇళయరాజా సంగీతం మరో హైలైట్. జి వి ప్రకాష్ ఇందులో ఓ కీలక పాత్రలో న‌టించాడు. ద‌ర్శ‌కుడు బాలాకి తెలుగులోనూ వీరాభిమానులున్నారు. అందువ‌ల్ల ఈ చిత్రంలో ఏదో ఒక కొత్త‌ద‌నం - వైవిధ్యం ఆశిస్తూ ఇక్క‌డా క్రేజు నెల‌కొంది.

ఇక‌పోతే తాజాగా రిలీజ్ చేసిన జ్యోతిక పోస్ట‌ర్లు క్యూరియాసిటీ మ‌రింత పెంచాయి. ఇందులో జ్యోతిక ఝాన్సీ అనే ఓ ప‌వ‌ర్‌ ఫుల్ పోలీసాఫీస‌ర్‌ గా న‌టించారు. క్రిమిన‌ల్స్ భ‌ర‌తం ప‌ట్టే అప‌ర‌కాళిక‌లా క‌నిపించ‌నుంద‌ని పోస్ట‌ర్లు చెబుతున్నాయి. ఈ సినిమాతో పాటు బాలీవుడ్ బ్లాక్‌ బ‌స్ట‌ర్ `తుమ్హారీ షులూ` రీమేక్‌ లోనూ జ్యోతిక న‌టిస్తోంది. ఇందులో మంచు ల‌క్ష్మి వేరొక కీల‌క పాత్ర‌లో న‌టిస్తుండ‌గా.. ప్ర‌స్తుతం ఆన్‌ సెట్స్ ఉందీ సినిమా.