కార్తి సినిమాలో కీలక పాత్రకు జ్యోతిక సై!

ఒక సినిమాపై ఆసక్తి కలగడానికి నటీనటుల కాంబినేషన్ కూడా ఎంతో ముఖ్యపాత్ర పోషిస్తుంది. అందులలోనూ నిజ జీవితంలో బంధువులు కలిసి ఒక సినిమాలో నటిస్తే ఆ సినిమాపై వెంటనే ప్రేక్షకుల దృష్టి మళ్ళుతుంది. తాజాగా అలాంటి కాంబినేషన్ ఒకటి కోలీవుడ్ లో సెట్ అయిందని టాక్.

కార్తి ఈమధ్య మలయాళ దర్శకుడు జీతూ జోసెఫ్ కు గ్రీన్ సిగ్నల్ ఇచ్చాడట. మలయాళం సినిమాలే కాకుండా కమల్ హాసన్ నటించిన 'పాపనాశం' చిత్రానికి కూడా జీతూ దర్శకత్వం వహించాడు. ఆయన కార్తి కోసం తయారు చేసిన కథలో హీరో హీరోయిన్లతో పాటుగా మరో కీలకమైన పాత్ర కూడా ఉందట. ఈ పాత్రకోసం కార్తి వదినగారు జ్యోతికను సంప్రదించడం.. ఆమె కుడా వెంటనే సరే అనడం చకచకా జరిగిపోయాయట. సో.. మొదటి సారి నిజజీవితంలో వదిన మరుదులైన జ్యోతిక - కార్తి స్క్రీన్ షేర్ చేసుకోబోతున్నారన్నమాట.

కార్తి ప్రస్తుతం 'ఖైది' అనే సినిమాలో నటిస్తున్నాడు. ఈ సినిమా తర్వాత 'రెమో' ఫేమ్ భాగ్యరాజ్ కన్నన్ దర్శకత్వంలో మరో సినిమాను లైన్లో పెట్టాడు. ఈ రెండు సినిమాల తర్వాతే 'జీతూ జోసెఫ్ సినిమా ఉంటుందని సమాచారం. కుదిరితే మాత్రం భాగ్యరాజ్ కన్నన్ సినిమా సెట్స్ మీదకు వెళ్ళడానికి ముందే ఈ సినిమాను ప్రారంభించే అవకాశాలు కూడా ఉన్నాయట. ఏదేమైనా ఈ వదిన మరుదులు కలిసి నటించనున్న సినిమా ఇప్పుడు కోలీవుడ్ లో హాట్ టాపిక్ అయింది.