‘సావిత్రి’కి దర్శకేంద్రుడి ప్రశంసలు

‘ప్రేమ ఇష్క్ కాదల్’ లాంటి వైవిధ్యమైన ప్రేమకథతో దర్శకుడిగా పరిచయమయ్యాడు పవన్ సాధినేని. కెరీర్ ఆరంభం నుంచి వైవిధ్యమైన సినిమాలే చేస్తున్న నారా రోహిత్.. ఈ యువ దర్శకుడితో కలిసి చేసిన సినిమా ‘సావిత్రి’. గత శుక్రవారం ప్రేక్షకుల ముందుకొచ్చిన ఈ సినిమాకు పాజిటివ్ టాక్ తో పాటు డివైడ్ టాక్ కూడా వచ్చింది. అయినప్పటికీ మంచి కలెక్షన్లతో సాగిపోతోందీ సినిమా. సినిమాలోని ఎంటర్ టైన్ మెంట్.. ఎమోషనల్ సీన్స్ ప్రేక్షకుల్ని ఆకట్టుకుంటున్నాయి.

ఈ చిత్రానికి దర్శకేంద్రుడు కె.రాఘవేంద్రరావు ప్రశంసలు లభించడం విశేషం. ఈ మధ్యే ‘సావిత్రి’ చూసిన రాఘవేంద్రరావు.. తనకు బాగా నచ్చడంతో దర్శకుడు పవన్ సాధినేనికి ఫోన్ చేశారట. సినిమా చాలా బాగుందని.. కామెడీ సీన్స్ తో పాటు ఎమోషనల్ సన్నివేశాలు బాగా డీల్ చేశావని అభినందించారట. నారా రోహిత్.. నందితల పెర్ఫామెన్స్ గురించి కూడా ఆయన మెచ్చుకున్నారట.

ముందు వారం విడుదలైన ‘ఊపిరి’ నుంచి గట్టి పోటీ ఉండటంతో ‘సావిత్రి’ కలెక్షన్లపై ప్రభావం పడుతోంది. ఐతే తక్కువ బడ్జెట్ లో సినిమా తీయడం వల్ల.. సినిమా బ్రేక్ ఈవెన్ కు వచ్చేస్తుందని అంచనా వేస్తున్నారు. ఆల్రెడీ కొన్ని చోట్ల బయ్యర్లు సేఫ్ జోన్ లోకి వచ్చేశారు. ‘సోలో’ తర్వాత మళ్లీ ఈ సినిమాతో మరోసారి కుటుంబ ప్రేక్షకులకు చేరువయ్యాడు నారా రోహిత్.