ఔను తేజ దర్శకత్వంలో చేస్తున్నా-కాజల్

మామూలుగా ఓ చిన్న సినిమాతో కథానాయికగా పరిచయమై.. పెద్ద రేంజికి ఎదిగాక ఆ చిన్న సినిమా తీసిన దర్శక నిర్మాతల్ని హీరోయిన్లు పట్టించుకోరు. కానీ తనకు ‘లక్ష్మీ కళ్యాణం’లో ఛాన్సిచ్చి హీరోయిన్ని చేసిన తేజను కాజల్ మరిచిపోలేదు. తాను ఎంతో మంది నటీనటుల్ని పరిచయం చేశానని.. కానీ వాళ్లలో చాలా కొద్ది మంది మాత్రమే కృతజ్నతతో ఉన్నారని.. అందులో కాజల్ ఒకరని ఆ మధ్య ఓ ఇంటర్వ్యూలో కితాబిచ్చాడు డైరెక్టర్ తేజ. గత కొన్నేళ్లుగా తేజ పరిస్థితేంటో కొత్తగా చెప్పాల్సిన పని లేదు. అతను సక్సెస్ కొట్టి దశాబ్దం దాటిపోయింది. మరోవైపు కాజల్ ఈ కాలంలో టాప్ రేంజికి ఎదిగింది. ఇప్పటికీ ఆమె అగ్ర హీరోయినే.

పవన్ కళ్యాణ్.. మహేష్ బాబు లాంటి సూపర్ స్టార్ల సరసన నటిస్తున్న ఈ టైంలో తేజ దర్శకత్వంలోనూ సినిమా చేయడానికి కాజల్ ఒప్పుకుందన్న వార్త ఆశ్చర్యం కలిగించేదే. ఈ వార్త ఉత్త ప్రచారమే అనుకున్నారు కొంతమంది. కానీ కాజలే స్వయంగా ఈ విషయాన్ని కన్ఫమ్ చేసింది. ప్రస్తుతం తాను చేయబోతున్న సినిమాల గురించి చెబుతూ.. ‘‘నా తొలి గురువు తేజ డైరెక్షన్లో నటిస్తున్నా. తెలుగులో ఇంకే సినిమా ఒప్పుకోలేదు. తమిళంలో విక్రమ్.. జీవాల సరసన నటిస్తున్నా. హిందీలో నటించిన ‘దో లఫ్జోంకీ కహానీ’ వచ్చే నెలలో విడుదలవుతుంది’’ అని కాజల్ వెల్లడించింది. ఆల్రెడీ ‘చందమామ’తో తనకు స్టార్ స్టేటస్ సంపాదించి పెట్టిన కృష్ణవంశీ కోసం ‘గోవిందుడు అందరివాడేలే’లో నటించింది కాజల్. ఇప్పుడు తన ఆది గురువు రుణం తీర్చుకునే పనిలో పడిందామె. ఈ సినిమాలో రానా హీరోగా నటిస్తాడని అంటున్నారు.