కాజల్ అంత డిమాండ్ చేస్తోందా?

అ! మూవీలో ప్రధాన పాత్ర ద్వారా మరోసారి ప్రేక్షకులను ఆకట్టుకున్న కాజల్ గత రెండేళ్ళుగా సరైన హిట్ లేక సతమతమవుతున్న సంగతి తెలిసిందే. ఖైది నెంబర్ 150 వంద కోట్లు వసూలు చేసినా అందులో హీరొయిన్ కాజల్ అనే విషయమే చాలా మందికి గుర్తు లేదు. చిరు మేనియా అలా కమ్మేసింది. దానికన్నా ముందు పవన్ కళ్యాణ్ - మహేష్ బాబులతో చేసిన సినిమాలు వాళ్ళ కెరీర్ లోనే బిగ్గెస్ట్ డిజాస్టర్లుగా మిగిలిన నేపధ్యంలో అవకాశాలు రావడం తగ్గిన మాట నిజమే. ఆ మాటకొస్తే అ! టాక్ బాగానే ఉంది కాని ఓవర్సీస్ మినహాస్తే ఇక్కడ వసూళ్లు మరీ అంత భీభత్సంగా ఏమి లేవు.తను చేస్తున్న సినిమాలలో కళ్యాణ్ రామ్ ఎమెల్యే(మంచి లక్షణాలున్న అబ్బాయి)వచ్చే నెల విడుదలకు సిద్ధపడుతోంది.

ఇది ఎలా ఉన్నా కాజల్ మాత్రం రెమ్యునరేషన్ విషయంలో చాలా బెట్టుగా ఉందనే టాక్ ఇప్పుడు బాగా నానుతోంది. శర్వానంద్ హీరోగా సుదీర్ వర్మ దర్శకత్వంలో రూపొందబోయే మూవీలో హలో ఫేం కళ్యాణి ప్రియదర్శన్ ఒక హీరొయిన్ కాగా మరో హీరొయిన్ గా కాజల్ నే అనుకున్నారు. శర్వా ఇందులో గ్యాంగ్ స్టర్ గా కనిపించనున్నట్టు ఇన్ సైడ్ టాక్. శర్వా అంత రఫ్ క్యారెక్టర్ లో కనిపించిన చివరి సినిమా ప్రస్థానం మాత్రమే. ఇప్పుడు ఇందులో దాన్ని మించే తరహాలో కొత్తగా శర్వాను చూపించేలా స్క్రిప్ట్ రాసుకున్నాడట సుధీర్ వర్మ. కీలకమైన ఒక ఎపిసోడ్ లో శర్వా లవర్ గా కనిపించే పాత్ర కోసం కాజల్ ను అడిగితే భారీగా డిమాండ్ చేసినట్టు టాక్.

తనకు బాగా డిమాండ్ ఉన్న స్థితిలో ఉన్నప్పటి పారితోషికం ఇప్పుడు కూడా అడిగితే ఎలా అని సదరు నిర్మాత అలోచనలో పడ్డారట. పూర్తి స్థాయి కాకున్నా ఇంత అడగటం న్యాయం కాదనిపించి వేరే ఆప్షన్ కూడా ఆలోచించే దిశలో ఉన్నారట. అయినా ఇప్పటికే బోలెడు సినిమాలు - స్టార్ డం తెచ్చుకున్న కాజల్ ఇప్పుడున్న పోటీలో వచ్చిన అవకాశాలు వచ్చినట్టు అందుకోవాలే కాని ఇలా బెట్టు చేస్తే ఎలా అంటున్నారు అభిమానులు. ఇది ఎంత వరకు నిజమో సుధీర్ - కాజల్ లకు మాత్రమే తెలుసు.