సినిమాల్లేని చందమామ కష్టాలు చూశారా

టాలీవుడ్ చందమామ కాజల్ అగర్వాల్ పక్కా ప్రొఫెషనల్ మాత్రమే కాదు.. పక్కా కమర్షియల్ కూడా అనే టాక్ ముందు నుంచి ఉంది. సినిమాలు చేయడంతో పాటు.. ఆయా చిత్రాలకు ప్రమోషన్స్ కూడా చేసే కాజల్.. రిలీజ్ వరకూ మాత్రమే వీటికి టైం కేటాయిస్తుంది. మూవీ రిలీజ్ తర్వాత మాత్రం అంజనం వేసి వెతికినా ఎక్కడా కనిపించదు ఈ బ్యూటీ.

కానీ ఇప్పుడు కాజల్ అగర్వాల్ టైం అంత గొప్పగా ఏం లేదు. గతంలో మాదిరిగా వద్దంటే వచ్చి పడిపోయే సంఖ్యలో అవకాశాలు కూడా లేవు. సీనియర్ సుందరాంగి అనే స్టాంప్ పడిపోవడం.. పారితోషికం విషయంలో ఆకాశంలో ఉండడం(ఈ మధ్య బెట్టు కాస్త తగ్గించిందని అంటున్నారు లెండి).. వంటివి కాజల్ కు మైనస్ పాయింట్స్ గా పరిణమించాయి. ఇలాంటి సమయంలో రిలీజ్ అయిన కాజల్ మూవీ ఎం.ఎల్.ఎ. కళ్యాణ్ రామ్ హీరోగా నటించిన ఈ చిత్రంలో అమ్మడి నటనకు మంచి మార్కులే పడ్డాయి. సినిమాకు చెప్పుకోదగిన స్థాయిలోనే వసూళ్లు వస్తున్నాయి కానీ.. హిట్ అనిపించుకునేందుకు ఇంకా చాలా దూరం ప్రయాణం చేయాల్సి ఉంది.

ఇప్పుడు ఎం.ఎల్.ఎ. చిత్రానికి సక్సెస్ మీట్ నిర్వహించగా.. ఈ కార్యక్రమానికి కాజల్ అటెండ్ కావడాన్ని హైలైట్ గా చెప్పుకోవచ్చు. బహుశా ఈ మధ్య కాలంలో అమ్మడు డే 1 నుండి ప్రమోట్ చేసి.. చివరకు సినిమా రిలీజయ్యాక కూడా సక్సెస్ మీట్ అంటూ రావడం ఇదే మొదటసారి. చేతిలో అంతగా సినిమాలు లేకపోవడంతోనే.. చందమామ ఈ రేంజులో కష్టపడుతోంది అంటున్నారు సినీ జనాలు.