మ‌న చంద‌మామ తంబీల‌కు అంకితం

చంద‌మామ కాజ‌ల్ ఇటీవ‌ల టాలీవుడ్‌ కు దూరం దూరంగా ఉంటున్న సంగ‌తి తెలిసిందే. ఖైదీనంబ‌ర్ 150 లాంటి బ్లాక్‌ బ‌స్ట‌ర్ లో న‌టించినా ఆ త‌ర్వాత పూర్తిగా త‌మిళ ప‌రిశ్ర‌మ వైపే వెళ్లిపోయింది కానీ తెలుగులో సంత‌కం చేసింది లేదు. మ‌ధ్య‌లో త‌న తొలి చిత్ర క‌థానాయ‌కుడు క‌ళ్యాణ్‌రామ్ స‌ర‌స‌న న‌టించింది. ఆ త‌ర్వాత మాత్రం త‌మిళంలో విజ‌య్‌ - అజిత్ - సూర్య - కార్తీ లాంటి హీరోల‌కే ప్రాధాన్య‌తనిస్తోంది.

ఈసారి ఆ ల‌క్కీ ఛాన్స్ జ‌యం ర‌విని వ‌రించింది. త‌ని ఒరువ‌న్ - టిక్ టిక్ టిక్ లాంటి ప్ర‌యోగాత్మ‌క చిత్రాల‌తో ఆక‌ట్టుకున్న జ‌యం ర‌వి వ‌రుస‌గా ప్ర‌యోగాలు చేస్తూ త‌న‌కంటూ ఓ ఇమేజ్‌ ని క్రియేట్ చేసుకున్నాడు. ఎంద‌రు స్టారాధిస్టార్లు ఉన్నా, త‌న‌కంటూ ఓ దారి ఉంద‌ని నిరూపిస్తున్నాడు. అందుకే అత‌డి డేరింగ్‌ & డ్యాషింగ్ స్టైల్‌ న‌చ్చి మ‌న చంద‌మామ ఓకే చెప్పింద‌ని భావిస్తున్నారు. జ‌యం ర‌వి హీరోగా న‌టించ‌నున్న ఈ చిత్రం టైటిల్ `అడంగ మారు`. డెబ్యూ కార్తీక్ తంగ‌వేల్ ద‌ర్శ‌క‌త్వం వ‌హిస్తున్నారు. జ‌యంర‌వి- కాజ‌ల్ తొలిసారి జంట‌గా న‌టిస్తున్నారు. వాస్త‌వానికి ఇదివ‌ర‌కూ `బోగ‌న్`లో జ‌యం ర‌వి స‌ర‌స‌న కాజ‌ల్ న‌టించాల్సింది కానీ, అప్ప‌ట్లో కాల్షీట్ల స‌ర్ధుబాటు ఇబ్బంది అవ్వ‌డంతో మిస్స‌య్యింది. ఈసారి మాత్రం ఆ స‌మ‌స్య లేదు.

మొత్తానికి కాజ‌ల్ వ్య‌వ‌హారం చూస్తుంటే తెలుగు హీరోల కంటే త‌మిళ హీరోల‌కే ప్రాధాన్య‌త‌నిస్తోంద‌ని అర్థ‌మ‌వుతోంది. ఇలా త‌మిళ తంబీల‌కే కాజ‌ల్ అంకిత‌మవ్వడం టాలీవుడ్‌ లో చ‌ర్చ‌కొచ్చింది. కాజ‌ల్ త‌మిళంలోనే క్వీన్ రీమేక్ పారిస్ పారిస్‌ లో న‌టిస్తున్న సంగ‌తి తెలిసిందే.