కాజల్ ని రమ్మని పిలిచిన పవన్

సర్దార్ గబ్బర్ సింగ్ లో కాజల్ అగర్వాల్ హీరోయిన్. గబ్బర్ సింగ్ మ్యాజిక్ రిపీట్ చేసేందుకు చాలా జాగ్రత్తలు తీసుకున్న పవర్ స్టార్ పవన్ కళ్యాణ్.. హీరోయిన్ విషయంలో ఫిల్టర్ చేసీచేసీ చివరకు టాలీవుడ్ చందమామ కాజల్ ని ఫైనల్ చేశాడు. సర్దార్ కి కాజల్ సైన్ చేసి ఇప్పటికి మూడు నెలలకు పైగానే అయింది.

సర్దార్ షూటింగ్ చాలా స్పీడ్ గా జరుగుతోందనే విషయం తెలిసినా.. కాజల్ కి మాత్రం యూనిట్ నుంచి పిలుపు రాలేదు. ఏంటీ సంగతి అనుకుంటున్న టైంలో షూటింగ్ లో జాయిన్ కావాల్సిందిగా కాజల్ కి కాల్ వచ్చింది. ఈ నెల 17 నుంచి గుజరాత్ లో జరగనున్న షూటింగ్ కి హాజరు కావాలని దాని సారాంశం. అక్కడ లాంగ్ షెడ్యూల్ ఉండడంతో పెట్టేబేడా సర్దుకుని రెడీ అవుతోంది కాజల్ అగర్వాల్.

నిజానికి టాలీవుడ్ చందమామ కెరీర్ కష్టాల్లో పడిందని అనుకుంటున్న టైంలో.. రెండు భారీ ఆఫర్స్ తలుపు తట్టాయి. అందులో ఒకటి పవర్ స్టార్ సరసన చేయబోతున్న సర్దార్ గబ్బర్ సింగ్ అయితే.. మహేష్ బాబు పక్కన బ్రహ్మోత్సవం మరొకటి. ఈ రెండు మూవీస్ లో ఏ ఒక్కటి బ్లాక్ బస్టర్ గా నిలిచినా... మరో మూడేళ్లు కాజల్ కెరీర్ కి ఢోకా లేనట్లే.