అదే జరిగితే కరోనా టీకాలు వేయిస్తా: కాజల్ అగర్వాల్

స్టార్ హీరోయిన్ కాజల్ అగర్వాల్ గురించి తెలుగు ప్రేక్షకులకు ప్రత్యేకంగా చెప్పాల్సిన అవసరం లేదు. కానీ కొన్నిసార్లు హీరోయిన్స్ సేవా కార్యక్రమాలలో పాల్గొంటూ హైలైట్ అవుతుంటారు. మరికొందరు తమ బ్యూటీతో హైలైట్ అవుతారు. ఇంకొందరు సెల్ఫ్ డబ్బా కొట్టుకొని హైలైట్ అవుతుంటారు. కానీ కొందరు మాత్రమే మంచిని మాటల్లో చెప్పి ఆహా అనిపిస్తారు. ఇదంతా ఇప్పుడెందుకు అనుకుంటే.. కాజల్ అలానే చేసింది మరి. ఇటీవలే కాజల్ నటించిన మోసగాళ్లు ప్రీ-రిలీజ్ ఈవెంట్ జరిగింది. ఆ సినిమా కోట్ల కుంభకోణం చుట్టూ తిరుగుతుంది. కాబట్టి అలాంటి ప్రశ్ననే కాజల్ ఫేస్ చేసింది. ఒక్కసారిగా వేలకోట్లు వస్తే ఏం చేస్తారు? అనే ప్రశ్నకు కాజల్ అదిరిపోయే సమాధానం ఇచ్చింది.

'అన్ని కోట్లు వస్తే ఏం చేస్తానో తెలియదు కానీ ఆ కోట్ల రూపాయలతో ముందుగా జనాలందరికి కరోనా వాక్సిన్ వేయిస్తాను. అప్పుడే అందరూ ఆరోగ్యంగా ఉంటూ పనులు చేసుకోగలరు. ఇదేదో అందాలపోటీ అన్నట్లుగా భావించట్లేదు. నాకు అనిపించింది చెప్పాను అంతే' అంటూ అందరిని ఆశ్చర్యానికి గురిచేసింది. కాజల్ సమాధానంతో ఆమె సేవాగుణం మరోసారి బయటపడిందని అభిమానులు ఫిదా అవుతున్నారు. ప్రస్తుతం అందరికి అవసరమైన కరోనా వాక్సిన్ గుర్తుచేసి అందరి మనసులు దోచుకుంది కాజల్. మార్చ్ 19న మంచు విష్ణు, కాజల్ నటించిన మోసగాళ్లు సినిమా పాన్ ఇండియా లెవెల్లో విడుదల అవుతోంది. ఇదేగాక కాజల్ ప్రస్తుతం మెగాస్టార్ ఆచార్య సినిమాలో, కమల్ హాసన్ ఇండియన్-2లో కూడా నటిస్తోంది. ఇప్పుడైతే మోసగాళ్లు ప్రమోషన్స్ తో బిజీగా ఉంది కాజల్.