కాజోల్ వస్తోంది.. ఇదిగో సాక్ష్యం..

బాలీవుడ్ బ్యూటీ కాజోల్ సౌత్ ఇండియాలో ఒకే ఒక్క సినిమాలో కనిపించింది. మిన్సార కణవు అంటూ తమిళ్ లో రూపొందిన ఈ మూవీ.. తెలుగులో మెరుపుకలలు టైటిల్ పై వచ్చి ఆకట్టుకుంది. ఇది 1997లో విడుదల కాగా.. మళ్లీ దాదాపు 20 ఏళ్ల తర్వాత కాజోల్ ఓ తమిళ్ మూవీలో చేసేందుకు అంగీకరించిందనే వార్తలు ఉన్నాయి. వీఐపీ2(వేలఇల్ల పట్టాదారి2) టైటిల్ పై రూపొందుతున్న చిత్రంలో కాజోల్ ను తీసుకున్నారనే టాక్ ఉంది కానీ.. ఇప్పటివరకూ అఫీషియల్ అనౌన్స్ మెంట్ లేదు.

ఈ సస్పెన్స్ కి ఇప్పుడు తెరదించేసింది మలయాళీ భామ అమలాపాల్. 'యాహూ... కాజోల్ కు నేను చాలా పెద్ద ఫ్యాన్. అనేక మంది ట్యాలెంటెడ్ ఆర్టిస్టులు ఒకచోటకు చేరబోతున్నారు. ఈ కాంబినేషన్ తో వర్క్ చేసేందుకు ఆసక్తిగా ఎదురుచూస్తున్నా. వీఐపీ2.. ఇందులో భాగం అయినందుకు చాలా గర్వంగా ఫీలవుతున్నా. ఎంతో అదృష్టం చేసుకుంటే కానీ ఇలాంటి అవకాశం దక్కదు' అంటూ కాజోల్.. ధనుష్ లు ఉన్న ఓ ఫోటోను పోస్ట్ చేసింది అమలాపాల్. సౌత్ సినిమాలో కాజోల్ రీఎంట్రీ ఇచ్చేస్తోందని అనడానికి సాక్ష్యంగా ఇదొక్కటి చాలు.

ధనుష్ మూవీ.. అందులోనూ అమలాపాల్ హీరోయిన్.. పైగా బాలీవుడ్ బ్యూటీ కాజోల్ నటించేస్తోంది.. అంతకు మించి వీఐపీ(రఘువరన్ బీటెక్)కి సీక్వెల్.. ఈ సినిమాని డబ్బింగ్ చేసి తెలుగులో వదిలేయడానికి మరే కారణాలు అవసరంలేదు. సూపర్ స్టార్ రజనీకాంత్ కూతురు సౌందర్య ఈ సినిమాకు డైరక్షన్ పగ్గాలు చేపట్టగా.. సినిమాకు కథను ధనుష్‌ అందిస్తున్న సంగతి తెలిసిందే.

Like Us on Facebook : https://www.facebook.com/Tupakidotcom/