కాజల్ కి గొడుగు పట్టిన నందమూరి హీరో

పటాస్ తర్వాత చెప్పుకోదగ్గ హిట్ లేని నందమూరి కళ్యాణ్ రామ్ నిర్మాతగా జై లవకుశతో హిట్టు కొట్టాక మళ్ళి హీరోగా కొత్త అడుగులు వేస్తున్నాడు. రొటీన్ పాత్రలతో మెప్పించలేం అని పసిగట్టిన కళ్యాణ్ రామ్ చేస్తున్న కొత్త సినిమా ఎమెల్యే(మంచి లక్షణాలున్న అబ్బాయి)షూటింగ్ చివరి దశలో ఉంది. కాజల్ తో మొదటి సారి జోడి కట్టిన ఈ మూవీ దర్శకుడు ఉపేంద్ర మాధవ్. గతంలో శ్రీను వైట్ల దగ్గర దూకుడు, బాద్షా లాంటి బ్లాక్ బస్టర్ మూవీస్ కి స్క్రిప్ట్ అసోసియేట్ గా చేసిన ఆయనకు దర్శకుడిగా ఇదే డెబ్యు మూవీ. పొలిటికల్ బ్యాక్ డ్రాప్ లో ఉంటూనే మంచి లవ్ స్టొరీ కూడా ఇందులో మిక్స్ చేసినట్టు ఫస్ట్ లుక్ పోస్టర్స్ నుంచి చెబుతూనే వచ్చారు.

తాజాగా వదిలిన స్టిల్స్ కూడా అదే స్పష్టం చేస్తున్నాయి. గత ఏడాది చిరంజీవి, రానా లతో మెప్పించిన కాజల్ మరోసారి ఇందులో కూడా మేజిక్ రిపీట్ చేసినట్టు కనిపిస్తోంది. తను ప్రేమించిన అమ్మాయి పట్ల చాలా బాధ్యత కలిగిన యువకుడిగా కళ్యాణ్ రామ్ పాత్ర ఉండబోతోంది అని పోస్టర్ ని బట్టే చెప్పొచ్చు. అందుకే వర్షంలో తడవకుండా కాజల్ ను గొడుగుతో కాపాడుకుంటూ ఉన్న ఎమెల్యేగా కళ్యాణ్ రామ్ ఆకట్టుకునేలా ఉన్నాడు. హెయిర్ స్టైల్, మీసకట్టు విషయంలో చాలా కొత్తగా ఫ్రెష్ గా కనిపిస్తున్న కళ్యాణ్ రామ్ ఇందులో చాలా స్పెషల్ గా ఉంటుందని టాక్.

చాలా గ్యాప్ తర్వాత మణిశర్మ ఎమెల్యే ద్వారానే కళ్యాణ్ రామ్ సినిమాకు సంగీతం అందిస్తున్నాడు. ఈ ఇద్దరి కాంబోలో వచ్చిన అతనొక్కడే ఎంత పెద్ద హిట్టో అందరికి గుర్తే. ప్రసాద్ మూరెళ్ళ కెమెరా అందిస్తున్న ఈ మూవీలో మరో హీరొయిన్ గా మనాలి రాథోడ్ కూడా నటిస్తోంది. ఆ మధ్య టీజర్ విడుదలై మంచి రెస్పాన్స్ దక్కించుకుంది. రిలీజ్ డేట్ విషయంలో ఇంకా క్లారిటీ రావాల్సి ఉంది. మార్చ్ మూడో వారం అనుకున్నారు కాని డేట్ కి సంబంధించి అఫీషియల్ అప్ డేట్ తెలియాల్సి ఉంది.